
काठमाडौं : नेपाल प्रिमियर लिग (एनपिएल)को तेस्रो संस्करणको उपाधि भिडन्त मंगलबारदेखि सुरु हुँदै छ । लिग चरणका २८ खेलपछि शीर्ष चारमा रहेका लुम्बिनी लायन्स, सुदूरपश्चिम रोयल्स, काठमाडौं गोर्खाज र चितवन राइनोज प्लेअफमा प्रवेश गरेका छन् । अब चार खेलबाट यस संस्करणको विजेता तय हुनेछ ।
मंगलबार हुने पहिलो क्वालिफायरमा लिग चरणको शीर्ष टोली लुम्बिनी लायन्स र दोस्रो स्थानको सुदूरपश्चिम रोयल्स भिड्नेछन् । त्रिवि अन्तर्राष्ट्रिय क्रिकेट मैदान कीर्तिपुरमा साँझ ५ बजे सुरु हुने खेलको विजेता सिधै फाइनल पुग्नेछ । पराजित टोलीले पनि उपाधि यात्रालाई निरन्तरता दिने अर्को अवसर पाउनेछ । उसले दोस्रो क्वालिफायर खेल्नेछ ।
बुधबार हुने एलिमिनेटरमा तेस्रो स्थानको काठमाडौं गोर्खाज र चौथो स्थानको चितवन राइनोज आमनेसामने हुनेछन् । यो खेलमा पराजित हुने टोली प्रतियोगिताबाट बाहिरिनेछ । विजेता भने दोस्रो क्वालिफायरमा पुग्नेछ ।
पहिलो क्वालिफायरमा पराजित टोली र एलिमिनेटरको विजेताबीच बिहीबार दोस्रो क्वालिफायर हुनेछ । त्यसको विजेताले शनिबार हुने फाइनलमा स्थान बनाउनेछ । फाइनल खेल पनि कीर्तिपुरमै साँझ ५ बजे हुनेछ ।
लिग चरणमा सात खेल खेलेको लुम्बिनीले पाँच जित, एक हार र एक नतिजाविहीन खेलबाट ११ अंक जोड्दै शीर्ष स्थान सुरक्षित गरेको हो । पाँच खेल जितेको सुदूरपश्चिमले १० अंकसहित दोस्रो स्थान हासिल ग¥यो । काठमाडौंले चार जितबाट आठ अंक जोडेर तेस्रो स्थान पक्का गर्दा चितवन तीन जित र एक नतिजाविहीन खेलबाट सात अंकसहित चौथो भयो ।
लिग चरणको अन्तिम खेलले प्लेअफको समीकरणमा काठमाडौंको स्थान भने बदल्यो । आइतबार भएको खेलमा पोखरा एभेन्जर्सले काठमाडौंलाई ५५ रनले पराजित गरेपछि काठमाडौं दोस्रो स्थानमा उक्लने अवसरबाट चुक्यो । पोखराले पहिले ब्याटिङ गर्दै २० ओभरमा तीन विकेट गुमाएर २२४ रन बनाएको थियो । जवाफमा काठमाडौंले नौ विकेट गुमाएर १६९ रन मात्र बनाउन सक्यो ।
अन्तिम खेलअघि काठमाडौंसँग शीर्ष दुईमा पुग्ने सम्भावना थियो । तर, पोखरासँगको हारपछि टोली तेस्रो स्थानमा सीमित भयो । त्यससँगै उसले पहिलो क्वालिफायर खेल्ने अवसर गुमायो र अब एलिमिनेटरबाट फाइनल यात्राका लागि संघर्ष गर्नुपर्ने भएको छ ।
चितवनले पनि लिग चरणको अन्तिम खेलमा कर्णाली याक्ससँग २४ रनको हार बेहोरेको थियो । तर, त्यसअघि नै शीर्ष चारमा स्थान सुरक्षित गरिसकेको चितवनले चौथो स्थान कायम राख्यो ।
लिग चरणको अंकतालिकामा पाँचौं स्थानमा रहेको विराटनगर किंग्स र छैटौं स्थानको कर्णाली याक्सले समान ६ अंक जोडे । पोखरा एभेन्जर्स र जनकपुर बोल्ट्सले चार–चार अंक पाएर क्रमशः सातौं र आठौं स्थानमा लिग यात्रा टुंग्याए ।