काठमाडौं : भारती पिक्चर्स प्रा.लि.को प्रस्तुतिमा प्रवासी साझा मञ्चद्वारा आयोजित भारती अन्तर्राष्ट्रिय म्युजिक अवार्ड २०२४ कार्यक्रम सम्पन्न भएको छ ।भारतको चन्डिगढस्थित टागोर थियटर सेक्टर १८ बिमा अवार्ड कार्यक्रम सम्पन्न भएको कार्यक्रमका संयोजक एवम् भारती पिक्चर्स प्रा.लि.का अध्यक्ष अमृत भारतीले जानकारी दिए ।
प्रवासी साझा मञ्चका अध्यक्ष कृष्ण कुमार श्रेष्ठको सभापतित्व र नेपाली दूतावास भारतका संस्कृति विभाग प्रमुख गोकुल बस्नेतको प्रमुख आतिथ्यतामा कार्यक्रम सम्पन्न भएको हो । कार्यक्रममा ५७ विधामा नेपालबाट गएका राष्ट्रिय कलाकारहरुलाई अवार्ड प्रदान गरिएको थियो ।
समाजसेवी तथा लोक गायक कृष्ण कँडेललाई दीर्घ साधना सम्मानद्वारा सम्मानित गरिएको थियो । दशकका गायिकाको रुपमा चर्चित लोक तथा दोहोरी गायिका पुर्णकला बिसीलाई सम्मान गरिएको थियो भने मौलिक लोक गायकको रुपमा चर्चित लोक गायक राम कुमार नेपालीलाई सम्मान गरिएको थियो ।
पत्रकार सम्मान कमल चौलागाईंले हात पारे । चन्डिगढमै पहिलो पटक यति धेरै कलाकार र चार हजार दर्शकको उपस्थितिमा सम्पन्न कार्यक्रमलाई चर्चित कार्यक्रम सञ्चालक पिएन सापकोटा र संस्थाका सचिव करण खड्काले सञ्चालन गरेका थिए ।
काठमाडौं : १३५औं अन्तर्राष्ट्रिय श्रमिक दिवसको अवसर पारेर निर्देशक पुर्णेन्दु के झाले फिल्म ‘लेबर’को घोषणा गरेका छन् । पुर्णेन्दु प्रोडक्सन्स प्रा.लि. र अरिपन फिल्म्स प्राइभेट लिमिटेडको संयुक्त व्यानरमा निर्माण हुने फिल्ममा विदेशिन बाध्य नेपाली र विदेशिन बाध्य बनाइने नेपालीको कथालाई प्रस्तुत गरिने फिल्म घोषणा गर्न आयोजित कार्यक्रममा जानकारी दिइयो ।
काठमाडौंको सुन्धारास्थित सिटिसी मलमा रहेको सिने डी सेफमा आयोजित घोषणा तथा टिजर सार्वजनिक कार्यक्रममा निर्देशक झाले यसले लेबर र सरकारबीचको कथा भन्ने बताए ।
‘हाम्रो देशबाट लेबरको काममा विदेशिन संख्या बढी छ । उनीहरूको आ–आफ्नै कथा छ । ती कथालाई पर्दामार्फत धेरै व्यक्तिसम्म पुर्याउनुपर्छ भन्ने लागेर हामीले फिल्म निर्माण गर्दैछौं,’ निर्देशक झाले भने । उनले फिल्मलाई मैथली भाषामा तयार गर्दैछन् । यद्यपि उनले नेपाली र भोजपुरीमा स्वराङ्कन गरेर प्रदर्शन गरिने जानकारी दिए ।
‘हामीले बाहिर त बजार बनायौं, तर नेपालमै मधेशमा स्वदेशी फिल्मलाई दर्शकले साथ दिएका छैनन् । यसकारण पनि विविध भाषामा तयार गरेर यसलाई प्रदर्शन गर्ने तयारी गरिरहेका छौं,’ उनले भने ।
सतेन्द्र झा, संजय साह, शेरू खान, शिखा ठाकुर, नारन अधिकारी, रमेश रञ्जन, धिरेन्द्र प्रेमर्षी र लक्ष्मी ठाकुर सह–निर्माता रहेको फिल्मलाई निर्देशक झासँगै नरेश मिश्राले लेखेका हुन् ।
उत्पल झा, राम भजन कामत, राजेश सक्सेना, राकेश यादव, जयनाथ अधिकारीलगायतका कलाकार अहिले तय भएको र अन्य कलाकार छिटै घोषणा गरिने निर्देशक झाले बताएका छन् ।
फिल्मका कलाकार उत्पल झाले यस फिल्मलाई लिएर आफू निकै उत्साहित रहेको बताए । ‘हामीले फिल्मलाई विषयप्रधान बनाउन थालेका छौं । यसमा मिथिलासँगै नेपालभरका दर्शकलाई हेर्ने कथा छ’, कलाकार झाले भने ।
कार्यक्रममा पूर्वराजदुत सूर्यनारायण मिश्र, राष्ट्रिय समाचार समितिका कार्यकारी अध्यक्ष धर्मेन्द्र झा, कलाकार रवीन्द्र झा, नेपाल चलचित्र संघका अध्यक्ष नरेन्द्र महर्जन, निर्देशक गणेशदेव पाण्डे, लेखक समीप्याराज तिमल्सेनालगायतको उपस्थिति रहेको थियो ।
फिल्ममा प्रवेश मल्लिकको संगीत तथा पाश्र्वसंगीत, हिमाल केसीको द्वन्द्व निर्देशन, आलोक शुक्लको छायाँकन, निमेष श्रेष्ठको सम्पादन, राजेन्द्र मोक्तानको रंग संयोजन, मल्लाज अडियो वर्कसको साउण्ड डिजाइन तथा मिक्सिङ, अक्की थेक्पाको कला निर्देशन रहेको छ ।
फिल्मको डिजिटल पार्टनरको रुपमा नेपाली भाषाका लागि ओएसआर डिजिटल र भोजपुरी तथा मैथली भाषाका लागि अरिपन फिल्म्स प्राइभेट लिमिटेड रहेको छ । प्रविण कुमार रावत प्रथम सहायक निर्देशक रहेको फिल्म ‘लेबर’लाई यसै वर्ष सन् २०२४ को अन्तिम महिना डिसेम्बरमा प्रदर्शन गर्ने निर्माण पक्षले जनाएको छ ।
काठमाडौं : आमा र आमाप्रतिको माया समेटिएको गीत ‘आमा तिमीलाई’ सार्वजनिक भएको छ । गोविन्द नागिलाको शब्द सिर्जनामा बनेको गीतमा विवि अनुरागीले संगीत भरेका छन् । गीतमा शान्तीश्री परियारको स्वर रहेको छ । गीतलाई नागिला नामक युटुब च्यानल मार्फत सार्वजनिक गरिएको छ ।
उक्त गीतको भिडियोमा शिल्पा पोखरेल, संगी अधिकारी पोखरेल, इन्दिरा भण्डारी नागिला तथा युशा भण्डारीको अभिनय रहेको छ । उक्त म्युजिक भिडियोमा उत्सव दाहालको छायाँकन विष्णु खड्काको सम्पादन तथा सुव्रतराज आचार्यको निर्देशन रहेको छ ।
काठमाडौं : निजी क्षेत्रबाट निर्मित पहिलो चलचित्र ‘माइतीघर’ का अभिनेता सिपी लोहनीको ८६ वर्षको उमेरमा आज दिउँसो काठमाडौंमा निधन भएको छ ।
अल्जाइमर रोगबाट पीडित लोहनीलाई निमोनियाको समस्या देखिएपछि माइतीघरस्थित अन्नपूर्ण न्यूरो अस्पतालमा भर्ना गरिएकोमा उपचारका क्रममा उनको निधन भएको उनका भतिज एवम् पत्रकार विकासप्रसाद लोहनीले जानकारी दिए ।
गीतसंगीत क्षेत्रमा विशेष रुचि राख्ने लोहनीले सरकारी सेवाअन्तर्गत अर्थ र उद्योग मन्त्रालयमा समेत काम गरेका थिए । उद्योग मन्त्रालयमा रहँदा विराटनगर जुटमिल र रघुपति जुटमिलमा निर्देशकको जिम्मेवारीमा रहेका थिए ।
वास्तविक नाम चिदम्बरप्रसाद लोहनी भएपनि छोटकरीमा सिपी लोहनीका नाममा चलचित्र तथा गीतसंगीत क्षेत्रमा उनी परिचित थिए । माइतीघर चलचित्रका अभिनेत्री माला सिन्हासँग विवाह गरेका स्वर्गीय लोहनीको एक छोरी हाल संयुक्त राज्य अमेरिकामा रहेको पत्रकार लोहनीले जानकारी दिए । लोहनीको आजै पशुपति आर्यघाटमा अन्त्येष्टी गरिने परिवारले जनाइएको छ ।
काठमाडौं : सत्यराज चौलागाई निर्देशित फिल्म ‘बिच्छेद’ले सर्वोत्कृष्ट फिचर फिल्म ‘दादासाहेब फाल्के चित्रनगरी (फिल्म सिटी) २०२४ ’ मा फिल्मले पुरस्कार जितेको छ । मुम्बईको वेदा कुनब थिएटर, चिन्ता टावरमा सम्पन्न उक्त कार्यक्रममा अवार्ड लिन चलचित्रकी निर्मात्री साबित्री बज्राचार्य मुम्बई पुगेकी थिइन ।
बज्राचार्यले दादासाहेब फाल्के चित्रनगरी (फिल्म सिटी) का जुरी, आयोजकलाई धन्यवाद दिँदै प्राप्त भएको अवार्डको खुसी सामाजिक सञ्जालमार्फत शेयर सबैमाझ साटेकी छिन् ।
मुकुन भुसाल र लक्ष्मी बर्देवाको मुख्य भूमिका रहेको फिल्ममा हिउँवाला गौतम, लय सङ्ग्रौला, प्रिया रिजाल, सुष्मा निरौला, जीवन थापा, सरिता राजोपाध्याय, लक्ष्मीनाथ तिमिल्सिना, जयराम सापकोटा आदिको अभिनय छ ।
सामाजिक विषयमा बनेको फिल्म ‘बिच्छेद’ को निर्मातामा राज कुमार पण्डित, दिमेश श्रेष्ठ, सुवास राई र सावित्री बज्राचार्य छन् भने सह-निर्मातामा सन्तोस गिरी र प्रविन राजथला छन् । नविन पुरीले प्रोडक्शन डिजाइन गरेको फिल्म मा भुपेन्द्र अधिकारीको सम्पादन, समीर मियाको भिएफएक्स, किरण तुलाधरको ब्याकग्राउन्ड स्कोर तथा रेनिश फागोको कलर ग्रेडिङ छ ।
फिल्मले गत हप्ता रामेछापमा सम्पन्न ‘तेस्रो नेपाल ग्रामीण चलचित्र महोत्सव - २०८०` अन्तर्गत चलचित्र सर्वोत्कृष्ट छायांकार र सर्वोत्कृष्ट चलचित्र जुरी अवार्ड दुई विधामा विजेता भएको थियो ।
तिलोत्तमा, रुपन्देही : रुपन्देहीको तिलोत्तमा– १० कान्छीबजारमा दोस्रो सांस्कृतिक मेला–२०८१ हुने भएको छ । दुर्गा मन्दिर टोल विकास संस्था तिलोत्तमा–१०, कान्छीबजारको आयोजनामा ‘कला, संस्कृति, कृषि र पर्यटनको विकास–हाम्रो अभियान’ भन्ने नाराका साथ दोस्रो कान्छीबजार सांस्कृतिक मेलाको आयोजना हुने भएको हो । मेला यही वैशाख २० गतेदेखि आगामी जेठ २ गतेसम्म सञ्चालन हुने टोल विकास संस्थाले जनाएको छ ।
स्थानीय कला र संस्कृतिको जगेर्ना गर्ने, स्थानीय प्रतिभाको प्रस्फुटन गर्ने र स्थानीयवासीलाई मनोरञ्जन प्रदान गर्ने उद्देश्यअनुरुप कान्छीबजारमा दोस्रो पटक बृहत् सांस्कृतिक मेलाको आयोजना गरिएको टोल विकास संस्थाका अध्यक्ष प्रकाश श्रेष्ठले जानकारी दिए । ‘कान्छीबजार यो क्षेत्रकै एउटा व्यापारिक केन्द्र हो । मेलामार्फत कान्छीबजारको प्रचार–प्रसार गर्ने र स्थानीय बजारको चहलपहल बढाउने हाम्रो मुख्य उद्देश्य हो, श्रेष्ठले भने ।’
मेलामा चर्चित लोकदोहोरी गायक बद्रि पँगेनी, लोकदोहोरी गायक पशुपति शर्मा, लोकदोहोरी गायिका शान्तीश्री परियार, लोकगायक प्रकाश सपुत, गायक शिव परियार, प्रमोद खरेल, हेमन्त शर्मा ज्योति मगर, प्रिती आले, एलिना चौहान, चर्चित भोजपुरी गायक खेसारी लाल, अन्नु चौधरी, प्रिती पासवानलगायत राष्ट्रिय तथा स्थानीय ख्यातिप्राप्त कलाकारहरुको बेजोड सांगीतिक प्रस्तुति रहने आयोजक संस्थाले जनाएको छ ।
संस्थाका अनुसार मेलामा ४० भन्दा बढी विभिन्न खालका व्यवसायीक स्टल रहने छन् भने युवा तथा बालबालिकाको मनोरञ्जनका लागि पिङ, झुलालगायतका मनोरञ्जनका सामग्रीसहित बाल उद्यान रहने बताइएको छ ।
गर्मी मौसमलाई ध्यानमा राख्दै मेला प्रत्येक दिनको साँझ ५ बजेदेखि रातको ११ बजेसम्म सञ्चालन हुने आयोजक संस्थाले जनाएको छ । अहिले मेला स्थलको व्यवस्थापन, स्टेज निर्माण, स्टल निर्माणलगायतका काम चलिरहेको र मेलाको व्यापक तयारी भइरहेको संस्थाका अध्यक्ष श्रेष्ठले बताए ।
स्थानीय स्तरमा आयोजित मेलाको अवलोकन गर्न र भरपूर मनोरञ्जन लिनका लागि संस्थाले नगर क्षेत्र वरपरका बासिन्दालाई विशेष आग्रहसमेत गरेको छ ।
बुटवल : राष्ट्रसेवक कर्मचारी लक्ष्मण पाण्डेको नयाँ लोक दोहोरी गीत सार्वजनिक भएको छ । पाण्डेको आफ्नै युट्युब च्यानल ‘लक्ष्मण पाण्डे’बाट सार्वजनिक गरिएको हो । ‘हाँसेबोले आनन्द हुनी’ बोलको गीतको म्युजिक भिडियोको निर्देशन विष्णु भट्टराईले गरेका हुन् ।
करिस्मा ढकाल, सन्तोष शर्मा र सगुन शर्माले अभियन गरेको उक्त म्युजिक भिडियोमा कुलेन्द्र विश्वकर्मा र शान्तीश्री परियारको स्वर रहेको छ । उक्त गीतको संगीत तथा शब्द लक्ष्मण पाण्डे स्वयं आफैंले गरेका छन् ।
मालाश्री स्टुडियोमा रेकर्डिङ गरिएको हो । मिक्स माष्टर खड्क बाजुरालीको रहेको म्युजिक भिडियोको एरेन्जर विनोद बाजुरालीले गरेका हुन् । अविरल फिलिम्सको पोष्ट पोड्क्सन रहेको म्युजि भिडियो युट्युबमा सार्वजनिक भएपछि छाटो समयमा नै लोकप्रिय भएको छ । पाण्डेले योभन्दा पहिला एकान्तमा आसु खसाए.., सुखी हुन्छ जिन्दगी... लगायतका म्युजिक भिडियो सार्वजनिक भएका छन् ।
काठमाडौं : अभिनेत्री केकी अधिकारीको निर्माण एवम् शीर्ष अभिनय रहेको फिल्म ‘बोक्सीको घर’ले आक्रामक ओपनिङ गरेको छ । शुक्रबार फिल्मले ७० प्रतिशतसम्म अकुपेन्सी कायम गरेको थियो । शनिबार बिदा हुँदा अकुपेन्सी दर थप उच्च रह्यो ।
वितरक कम्पनी टि–फल्कले फिल्मको दुई दिनको व्यापार २ करोड १५ लाख रहेको जनाएको छ । शनिबार २५० बढी शोमा डेढ सय शो पूर्ण हाउसफुल र बाँकीमा ८० प्रतिशतसम्म अकुपेन्सी रहेको वितरक कम्पनीको दाबी छ । विशेषगरी फिल्मको व्यापार काठमाडौंमा आक्रामक रहेको छ ।
फिल्मले छिट्टै अन्तर्राष्ट्रिय यात्रा समेत शुरु गर्दैछ । अमेरिका, अस्ट्रेलिया र युरोपका लागि फिल्मको प्रदर्शन अधिकारी बिक्री भइसकेको छ । ‘बोक्सीको घर’लाई रंगकर्मी सुलक्षण भारतीले लेखन तथा निर्देशन गरेका हुन् । फिल्ममा केकीसहित, सुपला सापकोटा, श्वेच्छा राउत, रमा थपलिया, सुष्मा निरौला, सुलक्षण भारती, सबिन बास्तोलालगायत कलाकारहरूको अभिनय छ ।
फिल्मले बोक्सी कुप्रथाको नाममा महिलामाथि हुने हिंसा र शोषणको कथा उठाएको छ । यसअघि यो कथामा नाटक मञ्चन भएको थियो ।
‘बोक्सीको घर’मा समावेश गीत ’बुझिनँ मैले’ लाई छोटो समयमै युट्युबमा एक करोड बढी पटक हेरिएको छ । सार्वजनिक भएको तीन सातामै आइतबार गीत करोड क्लबमा पुगेको हो । प्रकाश सपुतको सिर्जना तथा समीक्षा अधिकारीको स्वर रहेको यो गीत सार्वजनिक भएसँगै चर्चामा थियो ।
गीतले ‘बोक्सीको घर’को हाइप बढाउन महत्वपूर्ण भूमिका खेलेको र त्यसको फाइदा फिल्मको ओपनिङमा देखिएको अनुमान गरिएको छ ।
तिलु शर्मा पौडेल/मध्यान्ह
दोहा, कतार : स्याङ्जा सहयोग समाज कतारले आफ्नो १९औं वार्षिकोत्सवको अवसर पारेर राम्दीघाट वृद्धाश्रम सहयोगार्थ आयोजना गरेको विविध सांस्कृतिक कार्यक्रममा नेपालबाट आमन्त्रित कलाकारहरुले तहल्का मच्चाएका छन् । शुक्रबार दोहाको अल लक्तामा रहेको ट्युनिसियन स्कुलको विशाल सभा हलमा लोक तथा दोहोरी गायक खुमन अधिकारीसहित लोक तथा दोहोरी गायिका कमला गैह्रे र नृत्यंगना अस्मिता रनपालले तहल्का मच्चाएका हुन् ।
पुकार थापाले प्रस्तुति राख्दै सांस्कृतिक कार्यक्रमको ढोका उघारेसँगै गायिका गैह्रे स्टेज चढेकी थिइन् । उनले आफूलाई पहिलो पटक कतार आउने अवसर समाजले मिलाइदिएकोमा खुसी व्यक्त गर्दै आँधी खोलाको, मायाले जाम मात्रै भन्छ, माली गाइलाई बाटेको दाम्ला, डाँडा घरे साइँलीलगायतका गीतहरू गाइन् ।
रनपालको नृत्यले हलमा फरक जोस पैदा गर्यो भने अधिकारीले करिब दर्जनभन्दा बढी आफ्ना गीत प्रस्तुत गरे । उनले दर्शकहरूलाई नचाउन कुनै कसुर बाँकी राखेनन् । खुमनको प्रस्तुतिको पर्खाइमा बसेका दर्शक साँझसम्म पर्खेर पसिनाले निथ्रुक्क भिजेर नाचिरहेका थिए भने दर्शकहरूबाट वान्स मोर पाइरहे ।
समाजका अध्यक्ष प्रकाश परियारको सभापतित्व तथा स्याङ्जा सहयोग समाज अन्तर्राष्ट्रिय समन्वय समितिका अध्यक्ष वीरेन्द्रजंग केसीको प्रमुख आतिथ्यतामा सम्पन्न भएको सांस्कृतिक कार्यक्रममा बाल कलाकार जिया हमालले स्वागत नृत्य पेस गरेकी थिइन् । कलाकारहरू जीवन खालिङ राई, निरु श्रेष्ठ, रुस्तम तामाङ, अमित राईले आफना प्रस्तुति राखेका थिए ।
कतारमा स्थापित नेपाली संघ–संस्थाका प्रमुख तथा प्रतिनिधि, सामाजिक अभियन्तालगायतको उपस्थिति रहेको कार्यक्रममा आफ्नो शुभकामना मन्तव्य राख्दै प्रमुख अतिथि केसीले स्याङ्जा अन्तर्राष्ट्रिय समिति जन्माएको ठाउँमा आएर प्रमुख अतिथिको भूमिका निर्वाह गर्न पाउँदा खुसी लागेको बताए ।
कार्यक्रमलाई सफल बनाउन विभिन्न तह र तप्काबाट सहयोग गर्नेहरूलाई धन्यवाद ज्ञापन गर्दै परियारले कार्यक्रमको बिट मारेका थिए । नेपालबाट आमन्त्रित कलाकारहरू र राष्ट्रिय लोक तथा दोहोरी गीत प्रतिष्ठान कतारका कलाकारहरूबीचको लाइभ दोहोरीले माहोललाई दोहोरीमय बनाएको थियो ।
तमु (गुरुङ) समाज कतारले कार्यक्रमका सभापति परियारलाई फेटा (क्रेगी)द्वारा सम्मान गरेको थियो । आयोजकसहित दलित एकता सञ्जाल, परियार मित्रता समाज कतारले स्टेजमै दोसल्ला, मायाको चिनो र सम्मान पत्रले अधिकारी, रनपाल र गैह्रैलाई सम्मान गरेका थिए । समाजका वरिष्ठ उपाध्यक्ष घनश्याम जैसीले स्वागत मन्तव्य राखेको कार्यक्रममा करिब–करिब एक हजार दर्शकको उपस्थिति रहेको थियो । कार्यक्रम समाजका महासचिव टेक गैह्रे, अर्जुन पौडेल र रोशन अर्यालले मिलेर सहजीकरण गरेका थिए ।
काठमाडौं : डा. आरसी कोइराला 'रामचन्द्र' को निर्देशनमा गायक तथा मोडेल मिराज कोइराला र लोकप्रिय कलाकार तथा मोडेल प्रमिला रिजाल अभिनित म्युजिक भिडिओ सार्वजनिक भएको छ ।
आरसी कोइरालाको शब्द रचना, बंगलादेशका एम.ए. रह्मनको संगीत एवम् मिराज कोइरालाको स्वरमा रहेको रोमन्टिक गीत "तिमी मेरो जिन्दगी"को भिडिओमा मिराज प्रमिलालाई रोमान्टिक जोडीको रुपमा फिचरिङ गरिएको छ । भिडियो आर एस फिल्मस 'म्युजिक अफ नेपाल' युट्युब च्यानलबाट बजारमा आएको छ ।
प्रेमीद्वारा प्रेमिकाको वर्णन गरिएको गीतको भिडियो अति नै सुन्दर देश ग्रीसको समुन्द्री तटहमा खिचिएको छ। गीतको भिडियोमा आरसी कोइरालाको निर्देशन, रुपिन डंगोलको छायाँकन एवम् मिलन विश्वाकर्माको सम्पादन रहेको छ । भिडिओ आर एस फिल्मस 'म्युजिक अफ नेपाल'को पोष्ट प्रोडक्सनमा निर्माण भएको हो । मोडलिङको यात्रामा रहेका मिराज कोइरालाको दर्जन भिडिइो रिलिज भइसकेका छन् भने केही रिलिज हुने क्रममा रहेका छन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies