तिमी हाँस – तत्काल हाँसीहाल
अहिले नै तिमी हाँसेनौ भने, 
चुट्कीला र तिम्रो हाँसो दुवै असान्दर्भिक हुनेछन् । 

असान्दर्भिक हाँसो सबैभन्दा डर लाग्दो हुन्छ
धेरै धेरै मानिसहरु अचेल
अनेक असान्दर्भिक जोकहरुमा फसेर 
रुन अभिसप्त छन् ।

तिमी रोउ – तत्काल रोइहाल
अहिले नै तिमी रोएनौ भने, 
दुःख र तिम्रो आँसु दुवै असान्दर्भिक हुनेछन् । 

रोइसकेको मानिस सबैभन्दा बलियो देखिन्छ 
तर झन बलवान हुन्छन् – दुःख देखाउने मानिसहरु 
र आँसुको मसिले लेखिएका महाकाव्यहरु 
कहिल्यै असान्दर्भिक हुँदैनन् 

तिमीले लेख – तत्काल लेखिहाल
अहिले नै तिमीले लेखिनौ भने, 
विचार र तिम्रो अक्षरहरु दुवै असान्दर्भिक हुनेछन् । 

असान्दर्भिक विचार जति खतरनाक हुन्छ
त्यति नै कुरुप हुन्छन् – विचारविहिन निरस अक्षरहरु 
जसरी मानिसहरु विर्सन्छन् नागरिक हुनुको मूल्य
त्यसपछि रुपान्तरण हुन्छन् भीडमा र मर्छन् ।

तिमी मर –  तत्काल मरिहाल 
अहिले नै तिमी मरेनौ भने, 
यो समाज र तिम्रो मृत्यु दुवै असान्दर्भिक हुनेछन् ।