काठमाडौं : ओमस्टोन होटेल्स लिमिटेड (दुसित थानी हिमालयन रिर्सोट)ले प्रारम्भिक साधारण सेयर निष्कासन आइपिओ जारी गर्ने भएको छ । आइपिओ जारी गर्न रिसोर्ट र सिटिजन्स क्यापिटल लिमिटेडबीच साधारण सेयर निष्कासन तथा बिक्री प्रबन्धक नियुक्तिसम्बन्धी सम्झौता भएको हो ।
सम्झौताअनुसार सिटिजन्स क्यापिटलले दुसित थानीको प्राथमिक सेयर सार्वजनिक निष्कासनका लागि बिक्री प्रबन्धकको कार्य गर्नेछ । सो सम्झौतामा दुसित थानीको तर्फबाट अख्तियार प्राप्त प्रबन्ध निर्देशक रमेशकुमार हमाल र सिटिजन्स क्यापिटलको तर्फबाट प्रमुख कार्यकारी अधिकृत सबिर बादे श्रेष्ठले हस्ताक्षर गरेका हुन् ।
सम्झौता कार्यक्रममा संस्थापकका तर्फबाट प्रमुख विदेशी लगानीकर्ता विष्णु मोरको उपस्थिति पनि रहेको थियो ।
सन् २०२३ को चौथो त्रैमासिकदेखि सञ्चालनमा आएको दुसित थानी हिमालयन रिर्सोट काभ्रेपलाञ्चोक स्थित पात्लेखेत, धुलिखेलमा अवस्थित छ । दुसित थानीले नेपालसहित विभिन्न १८ वटा देशमा सेवा प्रदान गर्दै आइरहेको छ र नेपालमा दुसित थानी हिमालयन रिर्सोट (ओमस्टोन होटेल्स लिमिटेड)ले यसको प्रतिनिधित्व गरेको छ ।
