रौतहट : जिल्लाको देवाही गोनाही नगरपालिका–२ स्थित लालबकैया नदीमा नुहाउने क्रममा डुबेर बेपत्ता भएका तीन जना बालबालिकामध्ये दुई जनाको शव बुधबार बिहान फेला परेको छ । ​

जिल्ला प्रहरी कार्यालय रौतहटका अनुसार देवाही गोनाही नगरपालिका २ लक्ष्मिनियास्थित लालबकैया नदीमा नुहाउने क्रममा बेपत्ता भएका तीन बालबालिकामध्ये १० वर्षीय रमलुल्लाह र सवनम खातुनको शव फेला परेको हो । ​

घटनास्थलबाट करिब २.५ किलोमिटर दक्षिणतर्फ परोहा नगरपालिका–२ जिंगडवा क्षेत्रको लालबकैया नदीमा बुधबार बिहान ७ बजेतिर उनीहरूको शव तैरिरहेको अवस्थामा फेला परेको जिल्ला प्रहरी कार्यालय रौतहटका प्रवक्ता एवं प्रहरी नायब उपरीक्षक बसन्त गौतमले जनाए । ​

मंगलबार दिउँसो घटनालगत्तै नेपाल प्रहरी सशस्त्र प्रहरी र स्थानीयबासीको सहयोगमा अबेर रातिसम्म खोजी कार्य सञ्चालन गरिएको थियो। राति अध्यारोका कारण रोकिएको खोजी कार्य बुधबार बिहानैदेखि पुनः सुरु गर्दा डुबेको स्थानभन्दा तल दुई जनाको शव भेटिएको प्रहरीले जनाएको छ ।

​फेला परेका दुवै बालबालिकाको शवलाई कानुनी प्रक्रिया पूरा गरी पोष्टमार्टमका लागि गौरस्थित प्रादेशिक अस्पताल ल्याउने तयारी भइरहेको छ। ​यस्तै डुबेर बेपत्ता भएकी तेस्रो बालिकाको खोजी कार्य अझै तीव्र पारिएको प्रहरीले जनाएको छ ।

गोताखोर तथा स्थानीय सुरक्षाकर्मीको टोलीले नदी तटीय क्षेत्र तथा तल्लो तटीय इलाकामा निरन्तर खोजी गरिरहेको डिएसपी गौतमले बताए । ​वर्षायामका कारण नदीमा पानीको बहाव बढेको र तीव्र गति रहेकाले बालबालिकाहरूलाई नदी तथा जलाशय क्षेत्रमा एक्लै नपठाउन र विशेष सतर्कता अपनाउन जिल्ला प्रशासन तथा प्रहरी कार्यालयले अभिभावकहरूलाई आग्रह गरेको छ ।