काठमाडौं : व्यवसायीहरूको छाता संस्था नेपाल वैदेशिक रोजगार व्यवसायी संघले मलेसिया रोजगारीमा सिन्डिकेटको त्रास हटाउन युवा, श्रम तथा रोजगार मन्त्रालयले चालेको कदम सराहनीय रहेको जनाएको छ ।

मन्त्रालयको विज्ञप्तिपछि मध्यान्ह दैनिकसँग कुराकानी गर्दै संघका अध्यक्ष डिकबहादुर खत्री ‘कुमार’ले मलेसियाको रोजगारी औपचारिक रूपमा खुला हुने अवस्थामा सिन्डिकेटको चर्चाले आम व्यवसायीमा एकसाथ आक्रोश र निराशा पैदा भएका बेला मन्त्रालयबाट आएको विज्ञप्तिले संघसहित विभिन्न घटक संस्था र सरोकारवाला पक्षको चासो समयमै सुनुवाइ भएको देखिएको बताए ।

अध्यक्ष खत्रीले मलेसिया सिन्डिकेट सम्बन्धमा मन्त्रालयले जुन तदारुकताका साथ चासो देखाएको छ, सेवा शुल्क परिमार्जनलगायतका विषयमा पनि सोही स्तरको चासो मन्त्रालयबाट देखाइनुपर्ने बताए ।

त्यस्तै, नेपाल लोकतान्त्रिक वैदेशिक रोजगार व्यवसायी एसोसिएसनले वैदेशिक रोजगारीमा जाने नेपाली श्रमिकको हित, सुरक्षा र मर्यादित श्रमका लागि सरकारले देखाएको चासो र प्रतिबद्धता सकारात्मक रहेको जनाएको छ ।

एसोसिएसनका कार्यवाहक अध्यक्ष सुवर्ण लामा र महासचिव सुमनराज पाण्डेद्वारा जारी सन्देशमा वैदेशिक रोजगार व्यवसायलाई स्वच्छ, पारदर्शी, प्रतिस्पर्धी र श्रमिकमैत्री बनाउने दिशामा मन्त्रालयले चालेको कदम स्वागतयोग्य रहेको उल्लेख छ ।