काठमाडौं : नेपाली कम्युनिस्ट पार्टीका सम्मानित नेता झलनाथ खनालले छुट्टै ‘समाजवादी जागरण अभियान’ घोषणा गरेको भोलिपल्टै पार्टी संयोजक पुष्पकमल दाहाल प्रचण्डसँग भेटवार्ता गरेका छन् ।

मानभवनस्थित प्रचण्ड निवासमा भएको भेटवार्ता करिब डेढ घण्टा चलेको नेता खनालको सचिवालयले जनाएको छ । 

भेटमा नेता खनालले आफूले घोषणा गरेको अभियानको उद्देश्य र आगामी कार्यक्रमबारे प्रचण्डलाई जानकारी गराएका थिए ।

खनालले वामपन्थी शक्तिहरूबीचको वैचारिक बहसलाई अघि बढाउने, छरिएर रहेका कम्युनिस्ट शक्तिहरूलाई वैचारिक आधारमा एकताबद्ध गर्ने र वामपन्थी एकतालाई थप सुदृढ बनाउने उद्देश्यले अभियान सुरु गरेको बताएका छन् । 

तर, छुट्टै अभियान घोषणा गरेको भोलिपल्ट भएको भेटमा प्रचण्डले भने तत्कालै अभियान अघि नबढाउन आग्रह गरेको जनाइएको छ । 

प्रचण्डले खनालले अघि सारेको अभियानलाई सकारात्मक रूपमा लिएको बताउँदै पार्टीभित्रै रहेर वामपन्थी एकता र वैचारिक बहसलाई अघि बढाउन सकिने धारणा राखेका थिए । 

खनालले भने आफू नेपाली कम्युनिस्ट पार्टीमै प्रतिबद्ध रहेको बताएका छन् । आफू पार्टीबाट बाहिरिएर नयाँ राजनीतिक शक्ति निर्माण गर्न लागेको भन्ने आशयका विभिन्न सूचना बाहिर आएको भन्दै उनले त्यसमा सत्यता नरहेको बताएका छन् । प्रति दुःख व्यक्त गरेका थिए ।

अघिल्लो दिन अभियान घोषणा गर्दा खनालले नेपाली कम्युनिस्ट आन्दोलनलाई नयाँ वैचारिक बहस आवश्यक रहेको बताएका थिए । छरिएर रहेका कम्युनिस्ट शक्तिहरूलाई एक ठाउँमा ल्याउने र समाजवादी दिशामा अघि बढ्ने उद्देश्यसहित अभियान सुरु गरिएको उनको भनाइ थियो ।

त्यसको भोलिपल्टै प्रचण्डसँग भएको भेटले भने खनालको अभियानलाई लिएर नेकपाभित्रै छलफल सुरु भएको देखिएको छ । 

भेटमा पछिल्लो राजनीतिक घटनाक्रम, समसामयिक राजनीतिक विषय तथा सरकारका कामकारबाहीबारे पनि छलफल भएको थियो ।

खनाल लामो समयदेखि नेपालको कम्युनिस्ट आन्दोलनमा सक्रिय नेता हुन् । पछिल्लो समय कम्युनिस्ट आन्दोलनको वैचारिक दिशा, पार्टी सञ्चालनको शैली र वामपन्थी शक्तिबीचको एकताको विषयमा उनले बहस अघि बढाउँदै आएका छन् ।