काठमाडौं : नेपालमै पहिलो पटक ‘गजल, संगीत र ललितकला उत्सव’ सम्पन्न भएको छ । शनिबार दिउँसो १ बजे गजलको विकास, विस्तार र परिष्कारमा सक्रिय संस्थाहरू अनाममण्डली र अन्तर्राष्ट्रिय नेपाली गजल मञ्च तथा नेपाली संगीत प्रवद्र्धनमा क्रियाशील गोल्डेन क्रियसनको आयोजनामा उक्त उत्सव भएको हो ।
उत्सवमा नेपाल प्रज्ञा प्रतिष्ठान, नेपाल संगीत तथा नाट्य प्रज्ञा प्रतिष्ठान र नेपाल ललितकला प्रज्ञा प्रतिष्ठानले सहकार्य गरेका छन् ।
उत्सवमा सातवटै प्रदेशका स्रष्टाका राष्ट्रिय भावमा लेखिएका गजलहरूलाई विश्व कीर्तिमानी संगीतकार सन्तोष श्रेष्ठले आफ्नै संगीत र स्वरमा प्रस्तुत गरेका थिए । सुदूरपश्चिम प्रदेशबाट भुवन निस्तेज, कर्णालीबाट कुशलनाथ योगी, लुम्बिनीबाट सन्तोष श्रेष्ठ, गण्डकीबाट देवेन्द्र केसी ‘देवु’, बाग्मतीबाट राधा कणेल, मधेशबाट विवश पौडेल र कोसीबाट रश्मि असफलका तथा आयोजक संस्था अनाममण्डलीका अध्यक्ष रूपक अलंकार र अन्तर्राष्ट्रिय नेपाली गजल मञ्चका अध्यक्ष घनेन्द्र ओझाका गजलहरू प्रस्तुत गरिएका थिए ।
गाइएका गजलहरूमा नेपाल ललितकला प्रज्ञाप्रतिष्ठानका कुलपति नारदमणि हार्तम्छाली, उपकुलपति लालकाजी लामा, सदस्य सचिव देवेन्द्रकुमार काफ्ले ‘थुम्केली’ तथा प्राज्ञ परिषद् सदस्यहरू अरुणा हिङमाङ्ग, सौरगङ्गा दर्शनधारी, संजय वान्तवा, प्रदीप अधिकारी (सुशान्त), दिनेश्वर महतो र पाल्साङ्मो लामाले चित्र बनाएका थिए ।
कार्यक्रम संयोजक तथा अन्तर्राष्ट्रिय नेपाली गजल मञ्चका अध्यक्ष घनेन्द्र ओझाले नेपाली वाङ्मयका ३ विधा गजल संगीत र साहित्यलाई एकै थलोमा प्रस्तुत गरिएको र त्यसमाथि राष्ट्रिय भावका गजलको गायन नेपालमै पहिलो भएको जानकारी दिए ।
कवि, समालोचक प्रा.डा. देवी नेपालले सातै प्रदेशका राष्ट्रिय भावका गजलहरू समेटेर गायनमा प्रस्तुत गर्नु र त्यसमा सान्दर्भिक चित्रसमेत बनाउनु ऐतिहासिक कार्य भएको भन्दै आयोजक संस्थालाई बधाई दिए ।
नेपाल संगीत तथा नाट्य प्रज्ञाप्रतिष्ठानका सदस्य सचिव कुश्मा महरा (प्रगति)ले यस्तो ऐतिहासिक कार्यक्रममा सहकार्य गर्न पाउँदा प्रतिष्ठानले गर्व अनुभव गरेको बताइन् ।
नेपाल प्रज्ञा प्रतिष्ठानका कुलपति भूपाल राईले सबै भूगोल समेटेर प्रतिनिधि रूपमा गजलकार छनोट गरी साहित्य, संगीत र ललितकलालाई एकै थलोमा प्रस्तुत गर्ने काम महत्त्वपूर्ण रहेको र त्यसमा प्रतिष्ठानसमेत जोडिन पाउँदा खुसी लागेको बताए ।
नेपाल ललितकला प्रज्ञा प्रतिष्ठानका कुलपति नारदमणि हार्तम्छालीले कार्यक्रम सौहार्द, भव्य र सफल भएको भन्दै गजल, संगीत र ललितकलाको अभूतपूर्व संगमको साक्षी र सहभागी हुन पाएकामा हर्ष व्यक्त गरे । उनले यस्ता कार्यक्रमहरूले नेपाली वाङ्मयको विकासमा अर्थपूर्ण योगदान दिने बताए ।
.jpeg)
