रौतहट : रौतहटको चन्द्रपुर नगरपालिका क्षेत्रमा किशोरी समूहहरुले लैंगिक हिंसाविरुद्ध जनचेतना अभियान सुरु गरेका छन् । समुदाय स्तरमा बढ्दै गएको लैंगिक हिंसा समस्यालाई मध्यनजर गर्दै किशोरी समूहहरुले यस अभियानको शुरुवात गरेका हुन् । 

यस्तै चन्द्रपुर नगरपालिकाको विभिन्न वडाहरूमा स्थापित सामुदायिक सिकाई र संरक्षण केन्द्रहरूले अभियान सुरु गरेका छन् । केन्द्र संचालन गर्ने रजनी राईका अनुसार उक्त अभियानमा विशेष ध्यान समुदायमा लैंगिक हिंसाका असर र प्रभावको बारेमा जनचेतना फैलाउने कार्य गरिनेछ ।

यसै क्रममा, चन्द्रपुर नगरपालिका वडा नं. ८ स्थित उज्यालो सामुदायिक सिकाई केन्द्र र शुभबिहानी सिकाई केन्द्रको नेतृत्वमा बस्तिपुरमा एक फोटो ग्यालरी प्रदर्शनी कार्यक्रम आयोजना गरिएको थियो । कार्यक्रमको मुख्य उद्देश्य बालविवाह न्यूनीकरण र लैंगिक हिंसा सम्बन्धी जनचेतना जगाउनु रहेको छ ।

सहजकर्ता रमिता रामका अनुसार प्रदर्शनीमा लैंगिक हिंसाका सांकेतिक तस्बिरहरू तयार गरी चौकमा प्रदर्शनी राखिएको थियो । यस कार्यक्रममा कम्तिमा २०० जना स्थानीय महिला र पुरुषलाई लैंगिक हिंसाका प्रभाव र यसको रोकथामका बारेमा जानकारी गराइएको छ ।

यस प्रदर्शनी कार्यक्रमको आयोजनामा इस्लामिक रिलिफ नेपाल र ग्रामीण विकास केन्द्र नेपालले सहकार्य गरेका छन् । यस कार्यक्रमको उद्देश्य स्थानीय समुदायमा लैंगिक हिंसा विरुद्ध जागरूकता र शिक्षा प्रदान गर्नु रहेको आयोजकहरूले बताए ।