चितवन : उखु उत्पादक महासंघ, नेपालको अगुवाइमा आन्दोलनरत उखु किसानले भदौ २५ गतेदेखि अनिश्चितकालीन रूपमा राष्ट्रिय राजमार्ग अवरुद्ध गर्ने घोषणा गरेका छन् ।
महासंघका अनुसार सरकारले किसानलाई दिनुपर्ने अनुदान रकम बदनीयतपूर्वक कटौती गरेको र उखुको मूल्य तोक्दा किसानको सहभागिता सुनिश्चित नगरेको भन्दै यो कठोर कदम चाल्न बाध्य हुनुपरेको हो ।
महासंघका प्रवक्ता उमेशचन्द्र यादवले जारी विज्ञप्तिमा भनेका छन्,‘उखु किसानलाई दिनुपर्ने रकम सरकारले गैरजिम्मेवार ढंगबाट रोक्नु किसानको आत्मसम्मानमाथिको प्रहार हो । अब यो परिस्थितिबाट उत्पन्न हुने सम्पूर्ण जिम्मेवारी नेपाल सरकार, अर्थ मन्त्रालय र प्रधानमन्त्री तथा मन्त्री परिषद्को हुनेछ ।’
यसअघि १३ जिल्लाका किसानहरू भदौ ८ गतेदेखि काठमाडौंको माइतीघर मण्डलामा धर्ना तथा विरोध कार्यक्रम सञ्चालन गर्दै आएका थिए । कृषि मन्त्रीसहितको सरकारी टोलीसँग तीन चरणसम्म वार्ता भए पनि कुनै निष्कर्षमा नपुगेपछि आन्दोलनलाई अझ सशक्त बनाउने निर्णय गरिएको महासंघले जनाएको छ ।
महासंघले सरकारले ‘रातो किताब’मा नै समावेश गरेर सदनमार्फत पारित गरिसकेको २ अर्ब रुपैयाँ अनुदान रकम तत्काल बिना सर्त भुक्तानी गर्नुपर्ने र आगामी दिनमा उखुको मूल्य तोक्दा किसान प्रतिनिधिको अनिवार्य सहभागिता सुनिश्चित गर्नुपर्ने माग अघि सारेको छ ।
त्यस्तै, आन्दोलनलाई साथ–सहयोग गर्ने किसानप्रेमी जनसमुदाय, विभिन्न राजनीतिक दलका नेताहरू, पूर्वप्रधानमन्त्रीहरू तथा राष्ट्रिय–स्थानीय पत्रकारहरूलाई धन्यवाद दिँदै महासंघले सबैलाई आन्दोलनलाई अझ सशक्त बनाउन पहल गर्न अपिल गरेको छ ।
