नवलपरासी : संघीय लोकतान्त्रिक मोर्चा नवलपरासीले भूमि विधेयक खारेजको माग गर्दै शनिबार परासीमा विरोध प्रदर्शन गरेको छ ।
भूमि र वन बचाऔं, तराई–मधेशलाई मरुभूमिकरण हुनबाट जोगाऔं’ भन्ने नारासहितको विरोध कार्यक्रममा विभिन्न राजनीतिक दलका नेता तथा कार्यकर्ताहरूको व्यापक सहभागिता रहेको थियो ।
मोर्चाले आयोजना गरेको उक्त प्रदर्शनमा लोकतान्त्रिक समाजवादी पार्टी (लोजाप), जनता समाजवादी पार्टी (जसपा),जनता प्रगतिशील पार्टी नेपाल, नागरिक उन्मुक्ति पार्टी लगायतका दलका नेता–कार्यकर्ता सडकमा उत्रिएका थिए । प्रदर्शनकारीहरूले ‘भूमि विधेयक फिर्ता गर’, ‘किसानको अधिकार खोस्न पाइँदैन’ जस्ता प्लेकार्डसहित नाराबाजी गरेका थिए ।
विरोधसभामा सम्बोधन गर्ने नेताहरूले भने ‘यो विधेयकले तराई–मधेसलाई मरुभूमि बनाउनेछ, सरकारले कमिसन पाउनेछ, भूमाफियाले फाइदा लिनेछ, तर जनता मात्र कंगाल बन्नेछन् । त्यसैले विधेयक तत्काल खारेज हुनुपर्छ ।’
नेताहरूले भूमि विधेयक किसान र सर्वसाधारणको हितविपरीत रहेको आरोप लगाउँदै सरकारलाई तत्काल खारेज नगरे कठोर आन्दोलनमा जाने चेतावनी दिएका थिए । उनीहरूका अनुसार विधेयक कार्यान्वयन भएमा तराई–मधेशको उर्वरभूमि मरुभूमिकरणतर्फ धकेलिने, वन संहार हुने र स्थानीय जनताको हक अधिकार खोसिने जस्ता गम्भीर समस्या आउनेछन् ।
सयौंको सहभागिता रहेको प्रदर्शन परासी बजारका विभिन्न सडक परिक्रमा गरी बुद्धचोकमा सभामा परिणत भएको थियो ।