
काठमाडौँ : प्रतिजैविक औषधिको जथाभावी प्रयोग र दुरुपयोगबाट बढ्दै गएको प्रतिजैविक प्रतिरोधको जोखिमबारे जनचेतना अभिवृद्धि गर्ने उद्देश्यले प्रभातफेरी कार्यक्रम आयोजना गरिएको छ ।
विश्व प्रतिजैविक प्रतिरोध सचेतना सप्ताह २०२६ को अवसरमा स्वास्थ्य तथा खाद्य स्वच्छता मन्त्रालय र औषधि व्यवस्था विभागको आयोजनामा प्रभातफेरी गरिएको हो ।
आज बिहान सिंहदरबारको दक्षिण गेटबाट सुरु भएको प्रभातफेरी माइतीघर मण्डला हुँदै बबरमहलस्थित औषधि व्यवस्था विभाग पुगेर समापन भएको थियो ।
कार्यक्रममा मन्त्रालय, औषधि व्यवस्था विभाग, राष्ट्रिय औषधि प्रयोगशालाका कर्मचारी, औषधि व्यवसायी, विभिन्न संघ–संस्थाका प्रतिनिधि तथा सरोकारवालाहरूको सहभागिता रहेको थियो ।
प्रतिजैविक औषधिको जथाभावी प्रयोग र दुरुपयोगले औषधिप्रति सूक्ष्म जीवहरूको प्रतिरोध क्षमता बढ्दै जाने र यसले संक्रमणको उपचारलाई चुनौतीपूर्ण बनाउने भएकाले यससम्बन्धी जनचेतना फैलाउन कार्यक्रम आयोजना गरिएको जनाइएको छ ।