काठमाडौँ : अमेरिकाका राष्ट्रपति डोनाल्ड ट्रम्पले इरानसँग चलिरहेको युद्ध चाँडै अन्त्य हुने संकेत दिएका छन् । ह्वाइट हाउसमा पत्रकारहरूसँग कुरा गर्दै उनले यस्तो बताएका हुन् ।

पत्रकारहरूले सोधेको प्रश्नमा—के यो हप्ता नै युद्ध समाप्त हुन सक्छ?—ट्रम्पले जवाफ दिए, “हो, बिल्कुल ।” तर जब फेरि सोधियो कि वास्तवमै यही हप्ता युद्ध अन्त्य हुन्छ कि हुँदैन, उनले भने, “मलाई त्यस्तो लाग्दैन, तर यो चाँडै हुनेछ। धेरै समय लाग्दैन ।”

ट्रम्पले थप दाबी गरे कि इरानको मिसाइल आपूर्ति ठूलो मात्रामा नष्ट भइसकेको छ र युद्ध सुरु हुनु अघिको अवस्थाको तुलनामा अहिले निकै कमजोर भएको छ ।

यसै क्रममा उनले बेलायत तथा नेटोका सदस्य राष्ट्रहरूको आलोचना पनि गरे। ट्रम्पका अनुसार यी देशहरू युद्धका क्रममा अमेरिकालाई सहयोग गर्न हिचकिचाइरहेका छन् ।

तर उनले केही देशहरू स्ट्रेट अफ होर्मुजको सुरक्षासम्बन्धी अमेरिकी योजनामा सहयोग गर्न अघि बढिरहेको दाबी गरे । यद्यपि उनले ती देशहरूको नाम खुलाएनन्, तर दक्षिण कोरिया र चीनजस्ता राष्ट्रहरूले पनि अमेरिकालाई सहयोग गर्नुपर्ने उनको भनाइ छ ।