रौतहट ​: रौतहटको गरुडा नगरपालिका–८ स्थित बिर्ता चोकबाट प्रहरीले ठुलो मात्रामा प्रतिबन्धित लागुऔषधसहित एक जनालाई नियन्त्रणमा लिएको छ।

जिल्ला प्रहरी कार्यालय रौतहट र प्रहरी चौकी बिर्ताको संयुक्त टोलीले नियमित चेकिङका क्रममा तनहुँका १७ वर्षीय युवकलाई शनिबार बिहान लागुऔषधसहित पक्राउ गरेको हो। ​

पक्राउ पर्नेमा तनहुँ जिल्ला शुक्लागण्डकी नगरपालिका–३ कार्की डाँडा निवासी प्रदीप बहादुर कामीका १७ वर्षीय छोरा नविन बि.क. रहेका छन्। ​

प्रहरीका अनुसार शुक्रबार गौरबाट वीरगञ्जतर्फ जाँदै गरेको ना ४ ख ४७०४ नम्बरको यात्रुवाहक बसलाई बिर्ता चोकमा रोकेर जाँच गर्दा बि.क.को साथबाट लागुऔषध बरामद भएको हो। ​

निजले बोकेको झोलाभित्र कालो रङ्गको प्लाष्टिकमा लुकाइछिपाइ राखिएको अवस्थामा प्रमेथोजिन ४९ एम्पुल, सेरिज्याक ४९ एम्पुल र नुफिन ४९ एम्पुल गरी कुल १४७ एम्पुल नियन्त्रित लागुऔषध बरामद गरिएको प्रहरीले जनाएको छ । ​

लागुऔषधसहित नियन्त्रणमा लिइएका नविन बि.क.लाई जिल्ला प्रहरी कार्यालयको हिरासतमा राखी लागुऔषध नियन्त्रण ऐन अन्तर्गत थप अनुसन्धान तथा कानुनी प्रक्रिया अगाडि बढाइएको प्रहरी चौकी बिर्ताले जनाए । सीमावर्ती क्षेत्रबाट हुने लागुऔषधको अवैध ओसारपसार नियन्त्रण गर्न रौतहट प्रहरीले पछिल्लो समय चेकिङ र निगरानीलाई कडाइ गर्दै लगेको छ।