कपिलवस्तु : कपिलवस्तुको बाणगंगा नगरपालिका–१० मेचकुरीमा प्रहरीले अनुदानको मलमा भइरहेको कालोबजारी नियन्त्रण गर्न छापा मार्दा ठूलो परिमाणको डीएपी मल बरामद गरेको छ ।

प्रहरी उपरीक्षक सन्तोष आचार्यको निर्देशनमा इलाका प्रहरी कार्यालय पिपराका प्रहरी निरीक्षक अर्जुन पौडेलको नेतृत्वमा खटिएको टोलीले शुक्रबार बिहान विभिन्न चार स्थानबाट जम्मा २२६ बोरा अनुदानको डीएपी मल फेला पारेको हो ।

बरामद मल स्थानीय व्यापारी सुलेमान मुसलमानको स्वामित्वमा रहेको प्रहरीले जनाएको छ । छापा मारिएको स्थानहरूमा:

टोलीले शान्तराम थारुको घरबाट १५८ बोरा, दशरथ शाहीको घरबाट २१ बोरा, शिला शान्तिको घरबाट ३३ बोरा र सुलेमान मुसलमानकै घरबाट थप १४ बोरा गरी कुल २ सय २६ बोरा मल बरामद गरेको हो ।

प्रहरीका अनुसार बरामद मल कहाँ बुझाउने भन्ने विषयमा छलफल भइरहेको छ भने यसमा संलग्न व्यक्तिहरूमाथि कानूनी कारबाही अघि बढाउने तयारी छ ।

स्थानीयहरूले बजारमा मलको कृत्रिम अभाव सिर्जना गरी कालोबजारी गर्न अनुदानको मल घर–घरमा लुकाएर राखिएको आशंका गरेका छन् ।