काठमाडौं : आइसिसी टी–२० विश्वकप एसिया तथा इस्ट एसिया–प्यासिफिक छनोटको सुपर सिक्स चरणमा नेपालले युएईविरुद्ध १ रनको रोमाञ्चक जित निकाल्दै आफ्नो विश्वकप यात्रा थप बलियो बनाएको छ ।
शनिबार भएको खेलमा नेपालले दिएको १४१ रनको लक्ष्य पछ्याएको युएई २० ओभरमा ९ विकेट गुमाउँदै १३९ रनमै रोकियो । अन्तिम बलमा तीन रन आवश्यक परेका बेला युएईले एक रन मात्रै जोड्न सकेपछि नेपाल विजयी भयो ।
युएईका अलिशान सर्राफुले ५८ रनको अर्धशतकीय पारी खेले पनि टोलीलाई जित दिलाउन सकेनन् । उनले ४९ बलमा ५ चौका र २ छक्कासहित ५८ रन बनाए। ध्रुव पराशरले ३२ रनको योगदान दिए भने ओपनर जोनाथन फिगीले १९ रन बनाए ।
नेपालका बलरहरूमध्ये दिपेन्द्रसिंह ऐरी सर्वाधिक प्रभावशाली बने । उनले ४ ओभरमा ३ विकेट लिए। सोमपाल कामी, गुल्शन झा र सन्दीप लामिछानेले समान १–१ विकेट हात पारे ।
पहिले ब्याटिङ गरेको नेपालले निर्धारित २० ओभरमा ६ विकेटको क्षतिमा १४० रन जोडेको थियो। ओपनर आसिफ शेखले उत्कृष्ट अर्धशतक प्रहार गर्दै टोलीलाई सशक्त सुरुवात दिलाए । उनले ४७ बलमा ५ चौका र १ छक्कासहित ५१ रन बनाए ।
आसिफसँगै कुशल भुर्तेलले २६ बलमा २८ रन जोडे भने कप्तान रोहित पौडेलले २० रन बनाए । मध्यक्रममा गुल्शन झाले ५ बलमा १४ रनको छोटो तर उपयोगी पारी खेले ।
सुरुवाती १० ओभरमा एक विकेटमा ७३ रन बनाएको नेपालले त्यसपछि रनगति कायम राख्न सकेन । लगातार विकेट गुमाएपछि निर्धारित समयमै स्कोर १४० रनमै सीमित रह्यो ।
युएईका बलरहरू जुनेद सिद्दीकी, मुहम्मद रोहिद, जाहिद अली, हर्षित कौशिक, ध्रुव पराशर र हेदर अलीले समान १–१ विकेट लिएका थिए ।
यो जितसँगै नेपाल सुपर सिक्समा मजबुत स्थितिमा उभिएको छ ।
.gif)
