काठमाडौं : चिलिमे जलविद्युत् आयोजनाको सुरुङमा खोज तथा उद्धारका क्रममा चार शव र एक मानव अंग फेला परेको छ । नेपाली सेनाका अनुसार गोताखोरसहितको संयुक्त उद्धार टोलीले सुरुङमा ब्रेकथ्रु गरी अन्तिम किनारासम्म खोजी गर्दा ती शव तथा मानव अंग फेला पारेको हो ।

फेला परेका शव तथा मानव अंगलाई नेपाली सेनाको हेलिकप्टरमार्फत त्रिशूली ल्याइएको सेनाले जनाएको छ ।

सेनाका अनुसार यसअघि भदौ १५ गते पनि सोही सुरुङबाट एक शव र एक मानव अंग फेला परेको थियो । पछिल्लो खोजीसँगै चिलिमे सुरुङबाट फेला परेका शव तथा मानव अंगको संख्या थपिएको छ ।

चिलिमे सुरुङमा गोताखोरसहितको संयुक्त उद्धार टोलीले खोजी कार्य गरिरहेको छ । सुरुङमा ब्रेकथ्रु भएपछि टोलीले अन्तिम किनारासम्म पुगेर खोजी गरेको सेनाले जनाएको छ ।

अन्य सुरुङमा पनि खोजी

नेपाली सेनाका अनुसार लाङटाङ जलविद्युत् आयोजनाको सुरुङमा विदेशी प्राविधिकसहितको संयुक्त उद्धार टोलीले खोजी गरिरहेको छ ।

माथिल्लो त्रिशूली–१ को सुरुङभित्र आयोजनाका प्रतिनिधिसहितको संयुक्त उद्धार टोलीले खोजी गरिरहेको छ । त्रिशूली–३ ए को सुरुङ र पावर हाउस क्षेत्रमा पनि संयुक्त टोलीले खोजी गरिरहेको सेनाले जनाएको छ ।

त्रिशूली–३ बी मा नेपाली सेनासहितको संयुक्त टोलीले एक्स्काभेटर र लोडर प्रयोग गरी खोजी गरिरहेको छ । आयोजनाको आवास क्षेत्रमा दुई आवास भवनको प्लिन्थ क्षेत्रबाहेक अन्य संरचना फेला नपरेको सेनाले जनाएको छ । त्यहाँ खोजी कार्य जारी छ ।

प्रभावित क्षेत्रमा जमिनी खोजी

सेनाले रसुवा र नुवाकोटका त्रिशूलीपारि कोलोनी, तुप्चे, दानसिङ, सामरी भञ्ज्याङ, कालिकास्थान र मान्चेतलगायत स्थानमा बेस स्थापना गरी पैदल गस्तीमार्फत खोजी गरिरहेको जनाएको छ ।

स्याफ्रुबेँसी क्षेत्रमा तीन वटा समूहले खोजी गरिरहेका छन् । साँघुरा सुरुङको रेकी, प्रभावित क्षेत्रमा खोज तथा मूल्यांकन र सडक सम्पर्कबाट विच्छेद भएका दुर्गम स्थानमा ड्रोनमार्फत राहत सामग्री ढुवानीको काम पनि भइरहेको सेनाले जनाएको छ ।

नेपाली सेनाका अनुसार रसुवाको टिमुरेदेखि नुवाकोट, धादिङ, चितवन र नवलपरासी पूर्वका प्रभावित क्षेत्रमा ८ हजार ९ सयभन्दा बढी सैनिक प्रत्यक्ष रूपमा परिचालित छन् । उनीहरूले घाइतेको खोज तथा उद्धार, शव व्यवस्थापनमा सहयोग, राहत सामग्री ढुवानी, अवरुद्ध सडक तथा पुल सञ्चालन र आपत्कालीन उपचारमा समन्वयात्मक रूपमा काम गरिरहेका छन् ।