रौतहट : रौतहटको गौर भन्सारमा खटिएका सशस्त्र प्रहरी बलका डीएसपी गहेन्द्र भण्डारीमाथि एक महिलाले कुटपिट गरेको गम्भीर आरोप लगाएकी छन् ।
दुर्गा भगवती गाउँपालिका ४ पचरुखी निवासी २८ वर्षीया सुनिता देवीले पानी खान भन्सार नजिकै गएको बेला डीएसपी भण्डारीले आफूलाई लौरोले निर्घात कुटपिट गरेको बताइन् । खुट्टामा गम्भीर चोट लागेको र डाम समेत परेको पीडित महिलाले बताएकी छिन् ।
कुटपिटको घटना बाहिरिएसँगै स्थानीय बासिन्दाहरू आक्रोशित बनेका थिए । आक्रोशित भीडले सशस्त्र प्रहरी क्याम्प अगाडि ढुंगामुढा गर्दै विरोध प्रदर्शन गरेका थिए । स्थिति एक घण्टासम्म तनावग्रस्त बनेको थियो ।
न्यायका लागि जिल्ला प्रहरी कार्यालयमा समेत उजुरी दिन जाँदा सम्बन्धित निकायबाट कुनै सुनुवाइ नभएको महिलाले गुनासो गरेकी छन् । ‘मलाई सशस्त्रले कुटपिट गरेको कुरा बताउँदा पनि कोही बोल्दैनन्, नकुनै कारबाही हुन्छ,’ महिलाले भनिन् ।
स्थानीयले दोषी प्रहरीमाथि तत्काल निलम्बन र निष्पक्ष छानबिनको माग गर्दै छन् ।
यसबारे डीएसपी भण्डारीसँग बुझ्दा महिलामाथि कुटपिट भएको भन्ने कुरा असत्य भएको बताए । उनले आफु चार दिन अगाडि मात्र उक्त कार्यालयमा आएको र पोके तस्करहरुविरुद्धको कारबाहीमा कडाइ गरिएपछि आफुविरुद्ध तीनै तस्करहरुले अफवाह फैलाएको बताए । पोके तस्करविरुद्ध कडाइ भएपछि भन्सारको गेटमासमेत ढुंगामुढा र धकेलाधकेलसमेत भएको बताउँदै डीएसपी भण्डारीले आफुविरुद्ध अफवाह फैलाएर तस्करविरुद्धको कडाइ नरोकिने बताए ।
