काठमाडौं : नेपाल नेत्रज्योति संघको ४७औं स्थापना दिवसका अवसरमा काठमाडौंको बानेश्वमा रहेको नेपाल बाल सेवा फाउन्डेसनमा रहेका बालबालिकाहरुको निःशुल्क आँखा परीक्षण गरिएको छ ।
नेपाल नेत्रज्योति संघ केन्द्रीय कार्यालय तथा जिल्ला शाखा काठमाडौंको आयोजना तथा कीर्तिपुर आँखा अस्पताल तथा अध्ययन केन्द्रको प्राविधिक सहयोगमा शिविर संचालन गरिएको हो ।
नेपाल नेत्रज्योति संघ काठमाडौं शाखाका सभापति हुकुम प्रसाद पोखरेलका अनुसार फाउन्डेसनमा रहेका ५१ जना बालबालिकाको आँखा परीक्षण गरिएकोमा दृष्टिदोषको समस्या देखिएका १२ जनालाई चस्मा र अन्य समस्या देखिएका ९ जनालाई औषधिसमेत निःशुल्क वितरण गरिएको थियो भने अन्य समस्या देखिएका २ जनालाई अस्पताल रेफर गरिएको थियो ।
संघकी बोर्ड सेक्रेटरी सबिता केसीका अनुसार सो अवसरमा फाउन्डेसनमा आश्रित बालबालिकालाई खाजासमेत वितरण गरिएको थियो ।
नेपाल नेत्रज्योति संघका ४५ जिल्ला शाखा, २८ आँखा अस्पतालहरुले देशैभर आज विभिन्न कार्यक्रम आयोजना गरी ४७औं नेत्रज्योति दिवस मनाएका छन् ।
