काठमाडौँ : नेपाली कांग्रेसका सभापति गगन थापाले आगामी स्थानीय तह निर्वाचनको समय तालिकालाई ध्यानमा राख्दै पार्टीका प्रदेश र जिल्ला अधिवेशनको मिति निर्धारण गरिने बताएका छन् ।

पोखरामा आयोजित एक कार्यक्रममा बोल्दै थापाले बाँकी रहेका सांगठनिक अधिवेशनको कार्यतालिका केन्द्रीय समितिमा छलफल गरेर तय गरिने स्पष्ट पारे । स्थानीय निर्वाचनको तयारी र पार्टीको आन्तरिक संगठन व्यवस्थापनलाई सँगसँगै अघि बढाउनुपर्ने उनको भनाइ थियो ।

प्रदेश र जिल्ला तहका अधिवेशन सम्पन्न गर्नुपर्ने जिम्मेवारी बाँकी रहेको उल्लेख गर्दै उनले केन्द्रीय समितिका पदाधिकारी तथा सदस्यहरूसँग परामर्श गरेर उपयुक्त समय निर्धारण गरिने बताए । यस क्रममा आगामी स्थानीय निर्वाचनलाई समेत आधार बनाइने उनको भनाइ छ ।

थापाले पार्टीको अधिवेशन नेतृत्व चयनमा मात्रै सीमित हुन नहुने भन्दै त्यसबाट भएका निर्णयलाई संगठनको व्यवहारमा उतार्नु महत्त्वपूर्ण हुने बताए । अधिवेशनले तय गरेका नीति, कार्यक्रम र सांगठनिक प्रतिबद्धताको कार्यान्वयनलाई प्राथमिकता दिनुपर्नेमा उनले जोड दिए ।

पछिल्लो अधिवेशनमा ठूलो संख्यामा प्रतिनिधिहरूको सहभागिता रहेको उल्लेख गर्दै थापाले त्यसलाई नेपालको राजनीतिक इतिहासकै उल्लेखनीय सांगठनिक अभ्यास भएको दाबी गरे । ठूलो सहभागिताका कारण व्यवस्थापनमा चुनौती देखिए पनि सबै पक्षको सहयोगबाट अधिवेशन सफल भएको उनको भनाइ थियो ।

पार्टीभित्रको नेतृत्व प्रतिस्पर्धालाई जित र हारको सीमित दृष्टिकोणबाट हेर्न नहुने धारणा पनि उनले राखे । आन्तरिक निर्वाचनमा पराजित भएका नेताहरूलाई जिम्मेवारी र अवसरबाट वञ्चित गर्ने प्रवृत्तिले संगठनलाई कमजोर बनाउन सक्ने संकेत गर्दै उनले सबैको क्षमता उपयोग गर्नुपर्ने बताए ।

विशेष गरी केन्द्रीय समितिको प्रतिस्पर्धामा सहभागी भएर निर्वाचित हुन नसकेका योग्य तथा अनुभवी नेताहरूलाई समेत पार्टी सञ्चालनमा समेट्नुपर्ने उनको भनाइ थियो । नेतृत्व चयनको परिणामलाई आधार बनाएर कुनै पक्षलाई पूर्ण रूपमा अवसर दिने र अर्को पक्षलाई अलग्याउने अभ्यास कांग्रेसभित्र स्वीकार्य हुन नहुनेमा उनले जोड दिए ।

थापाका अनुसार आन्तरिक प्रतिस्पर्धामा सहभागी नेताहरूले प्राप्त गरेको अनुभव, सिकाइ र राजनीतिक क्षमतालाई पार्टीको साझा उपलब्धिका रूपमा उपयोग गर्न सक्नुपर्छ । फरक विचार, कार्यशैली र अनुभव भएका व्यक्तिहरूबीच सहकार्य कायम गर्नु संगठनको हितमा हुने उनको धारणा थियो ।

उनले पार्टीभित्र प्रतिस्पर्धाका क्रममा उत्पन्न तिक्तता, कटुता र असहिष्णुता अन्त्य गर्नुपर्ने आवश्यकता पनि औँल्याए । अधिवेशनमा फरक समूहबाट प्रतिस्पर्धा गरेकै कारण नेताहरूबीच संवाद र सहकार्य अवरुद्ध हुने अवस्था रहन नहुने उनको भनाइ थियो ।

कांग्रेसमा वडादेखि केन्द्रीय तहसम्म अधिवेशनका क्रममा संस्थागत रूपमा गुट निर्माण हुने प्रवृत्तिबारे पनि थापाले असन्तुष्टि व्यक्त गरे । यस्तो अभ्यास अन्त्य गर्ने प्रयास गरिएको उल्लेख गर्दै उनले प्रतिस्पर्धापछि पार्टीलाई साझा सांगठनिक उद्देश्यमा केन्द्रित गर्नुपर्ने बताए ।