काठमाडौँ : दसैंका लागि सार्वजनिक यातायातको अग्रिम टिकट बुकिङ खुलाउने विषयमा निर्णय गर्न यातायात व्यवस्था विभागले मंगलबार सरोकारवालाको बैठक बोलाएको छ ।

बैठकमा यातायात व्यवसायी, मजदुर संगठन, ट्राफिक प्रहरी तथा सम्बन्धित सरकारी निकायका प्रतिनिधि सहभागी हुनेछन् । चाडबाड नजिकिए पनि सार्वजनिक यातायातको अग्रिम टिकट बुकिङ औपचारिक रूपमा खुलिसकेको छैन । जसका कारण काठमाडौँ उपत्यकाबाट घर फर्कने तयारीमा रहेका यात्रु अन्योलमा छन् ।

केही यातायात कम्पनीले भने अनलाइनमार्फत टिकट बुकिङ सुरु गरिसकेका छन् । तर सबै सार्वजनिक यातायातका लागि बुकिङ खुल्ने मिति तय नभएकाले यात्रुको अन्योल कायमै छ ।

विभागले बैठकमा अग्रिम टिकट बुकिङ खोल्ने मितिसँगै दसैंका बेला यात्रुको चाप व्यवस्थापन, पर्याप्त सार्वजनिक यातायातको व्यवस्था तथा सुरक्षित र व्यवस्थित यात्राबारे छलफल गर्नेछ । बैठकमा ट्राफिक प्रहरी, नेपाल यातायात व्यवसायी राष्ट्रिय महासंघ, विभिन्न यातायात मजदुर संगठन तथा यातायात व्यवसायीका प्रतिनिधिलाई बोलाइएको छ ।

यस वर्ष दसैंका क्रममा काठमाडौँ उपत्यकाबाट १० लाखभन्दा बढी यात्रु बाहिरिने अनुमान गरिएको छ । विगतमा चाडबाडका बेला टिकट अभाव, बसपार्कमा लामो लाइन र यातायातको चापका कारण यात्रुले सास्ती भोग्दै आएका छन् । मंगलबारको बैठकबाट अग्रिम टिकट बुकिङ खुलाउने समयसहित यात्रु व्यवस्थापनका आवश्यक निर्णय हुने अपेक्षा गरिएको छ ।