
काठमाडौं : प्रधानमन्त्री बालेन्द्र शाहको आसन्न भारत भ्रमणलाई मन्त्रिपरिषद् बैठकले स्वीकृति दिएको छ । शुक्रबार बसेको बैठकले भ्रमण स्वीकृत गरेको सञ्चारमन्त्री विक्रम तिमल्सिनाले जानकारी दिएका हुन् ।
प्रधानमन्त्री शाह मंसिर ६ र ७ गते भारतको दुईदिने राजकीय भ्रमणमा जानेछन् । उनी आइतबार दिउँसो १ः४५ बजे नेपाल एयरलाइन्सको नियमित उडानमार्फत नयाँदिल्ली प्रस्थान गर्नेछन् भने सोमबार साँझ ६ः३५ बजे स्वदेश फर्कने कार्यक्रम छ ।
परराष्ट्र मन्त्रालयका अनुसार प्रधानमन्त्रीको भ्रमण टोली ३४ सदस्यीय हुनेछ । टोलीमा अर्थमन्त्री डा. स्वर्णिम वाग्ले, परराष्ट्रमन्त्री शिशिर खनालसहित विभिन्न मन्त्रालयका उच्च अधिकारी सहभागी हुनेछन् । यसबाहेक निजी क्षेत्रका ५२ जना व्यवसायी पनि आफ्नै खर्चमा भारत जानेछन् ।
भ्रमणका क्रममा प्रधानमन्त्री शाहले मंसिर ७ गते भारतीय प्रधानमन्त्री नरेन्द्र मोदीसँग प्रतिनिधिमण्डलस्तरीय वार्ता गर्नेछन् । वार्तापछि संयुक्त पत्रकार सम्मेलन तथा मोदीले आयोजना गर्ने औपचारिक मध्याह्नभोजमा सहभागी हुने कार्यक्रम छ । उनले भारतीय राष्ट्रपति द्रौपदी मुर्मु र विदेशमन्त्री एस. जयशंकरसँग पनि भेट गर्नेछन् ।
त्यस्तै, प्रधानमन्त्री शाहले राजघाट पुगेर महात्मा गान्धीप्रति श्रद्धाञ्जली अर्पण गर्नेछन् । भ्रमणका क्रममा नेपाल–भारतबीच ऊर्जा, पूर्वाधार र सम्पर्क सञ्जाल विस्तारसम्बन्धी परियोजनाको उद्घाटन तथा नयाँ परियोजनाको शिलान्यास गर्ने कार्यक्रम पनि रहेको छ ।
दुई प्रधानमन्त्रीबीचको वार्तामा व्यापार, पारवहन, लगानी, ऊर्जा, पूर्वाधार, शिक्षा, स्वास्थ्य, कृषि तथा विपद् व्यवस्थापनलगायतका विषयमा छलफल हुनेछ । साथै, नेपाल–भारत बिजनेस फोरममा सहभागी भएर प्रधानमन्त्री शाहले भारतीय व्यवसायीलाई नेपालमा लगानी गर्न आग्रह गर्ने कार्यक्रम छ ।
प्रधानमन्त्री स्वदेश फर्किएपछि परराष्ट्रमन्त्री शिशिर खनालले त्रिभुवन अन्तर्राष्ट्रिय विमानस्थलमा पत्रकार सम्मेलन गरी भ्रमणका उपलब्धिबारे जानकारी गराउने मन्त्रालयले जनाएको छ ।