काठमाडौँ : पूर्वाञ्चल विश्वविद्यालयले आगामी आर्थिक वर्ष २०८३-८४ का लागि १ अर्ब ९९ करोड १६ लाख ९७ हजार रुपैयाँको बजेट पारित गरेको छ । विश्वविद्यालयको ४३औँ सभाले आगामी वर्षका लागि प्रस्तावित आय-व्यय विवरण, नीति तथा कार्यक्रम सर्वसम्मत रूपमा स्वीकृत गरेको हो ।

सिंहदरबारस्थित शिक्षा मन्त्रालयमा शिक्षा तथा खेलकुद मन्त्री एवं विश्वविद्यालयका सहकुलपति सस्मित पोखरेलको अध्यक्षतामा बसेको सभामा रजिस्ट्रार प्रा.डा. पन्ना बहादुर थापाले प्रस्तुत गरेको बजेट तथा नीति कार्यक्रम पारित भएको विश्वविद्यालयले जनाएको छ ।

विश्वविद्यालयले आगामी वर्ष शैक्षिक रूपान्तरण, प्रविधिमैत्री पूर्वाधार विकास र चिकित्सा शिक्षाको विस्तारलाई प्राथमिकतामा राखेको छ । गोठगाउँमा रहेको ८०५ बिघा जग्गामा गुरुयोजनाअनुसार एकीकृत भौतिक संरचना निर्माण तथा विकास गर्ने योजना अघि सारिएको छ ।

प्रविधितर्फ कृत्रिम बुद्धिमत्ता (एआई), डाटा साइन्स र साइबर सेक्युरिटीलगायतका क्षेत्रमा नयाँ तथा विशिष्टीकृत पाठ्यक्रम निर्माण गरी सञ्चालन गर्ने विश्वविद्यालयको योजना छ । चिकित्सा शिक्षा र इन्जिनियरिङतर्फ पनि आवश्यकता र बजार अनुकूल विशिष्टीकृत पाठ्यक्रम विकास गर्ने नीति लिइएको छ ।

विश्वविद्यालयका प्रशासनिक तथा शैक्षिक सेवा प्रणालीलाई एकीकृत डिजिटल इकोसिस्टममा रूपान्तरण गरी सेवा प्रवाहलाई सहज, पारदर्शी र प्रविधिमैत्री बनाउने लक्ष्यसमेत बजेटमा समेटिएको छ ।

चिकित्सा शिक्षातर्फ गोठगाउँ परिसरमा निर्माणाधीन १०० शय्याको मातृ–शिशु अस्पताल निर्माण सम्पन्न गर्ने योजना विश्वविद्यालयले अघि सारेको छ । कोशी अस्पतालसँगको सहकार्यमा चिकित्सा शिक्षाको गुणस्तर सुधार तथा शैक्षिक कार्यक्रमलाई थप प्रभावकारी बनाउने कार्यक्रमसमेत राखिएको छ ।

सभालाई सम्बोधन गर्दै शिक्षामन्त्री पोखरेलले प्रविधिको तीव्र विकास र विश्वव्यापीकरणबाट सिर्जित आवश्यकताअनुसार उच्च शिक्षा प्रणालीमा परिवर्तन आवश्यक रहेको बताए । विश्वविद्यालयले विद्यार्थीलाई रोजगारी खोज्ने जनशक्तिमा मात्र सीमित नराखी रोजगारी सिर्जना गर्न सक्ने उद्यमशील जनशक्तिका रूपमा विकास गर्नुपर्नेमा उनले जोड दिए ।

पारित नीति तथा कार्यक्रमलाई प्रभावकारी रूपमा कार्यान्वयन गर्न स्पष्ट कार्ययोजना, जिम्मेवारी र समयसीमा निर्धारण गर्न पनि मन्त्री पोखरेलले विश्वविद्यालय नेतृत्वलाई निर्देशन दिए ।

शिक्षा मन्त्रालयका सचिव चुडामणि पौडेलले स्वीकृत बजेटलाई प्रभावकारी रूपमा कार्यान्वयन गर्दै शैक्षिक प्रणाली सुधारमा केन्द्रित हुनुपर्ने बताए । अर्थ मन्त्रालयका सचिव घनश्याम उपाध्यायले विश्वविद्यालयले प्रस्तुत गरेको बजेट तथा नीति कार्यक्रमलाई सकारात्मक रहेको धारणा राखे ।

विश्वविद्यालयले अनुसन्धान र अन्तर्राष्ट्रिय सहकार्यलाई समेत आगामी वर्षको कार्यक्रममा समेटेको छ । जलवायु परिवर्तन तथा विपद् जोखिम न्यूनीकरणसम्बन्धी विशेष अनुसन्धान केन्द्र स्थापना गर्ने, विदेशी विश्वविद्यालयसँग संयुक्त डिग्री तथा विद्यार्थी आदान-प्रदान कार्यक्रम सञ्चालन गर्ने र पछाडि परेका वर्गका विद्यार्थीलाई समावेशी छात्रवृत्तिको पहुँच विस्तार गर्ने योजना अघि सारिएको छ ।

सभाले विश्वविद्यालयको कार्यकारी परिषद्का लागि तीन वर्षका लागि तीन सदस्य मनोनयन गर्ने निर्णयसमेत गरेको छ । डीनतर्फ चिकित्साशास्त्र संकायकी डीन प्रा.डा. परिचा उपाध्याय ढुंगेल र कला, कानून तथा शिक्षाशास्त्र संकायका डीन प्रा.डा. कृष्णप्रसाद पाण्डेलाई तथा शिक्षकतर्फ पूर्वाञ्चल विश्वविद्यालय स्कुल अफ म्यानेजमेन्ट, विराटनगरमा कार्यरत प्राध्यापक मोहनबहादुर बस्नेतलाई मनोनयन गरिएको विश्वविद्यालयले जनाएको छ ।

पारित नीति, कार्यक्रम तथा बजेटमार्फत पूर्वाञ्चल विश्वविद्यालयलाई गुणस्तरीय, प्रतिस्पर्धी, अनुसन्धानमुखी, प्रविधिमैत्री र आत्मनिर्भर उच्च शैक्षिक संस्थाका रूपमा विकास गर्ने लक्ष्य राखिएको छ ।