रौतहट : रौतहटको कटहरिया नगरपालिकामा मेयर अजय प्रकाश जयसवाल र कर्मचारीहरूबीचको तलब विवादले प्रशासनिक कामकाज पूर्ण रूपमा अवरुद्ध भएको छ । बक्यौता तलब र सुविधा नदिएको भन्दै करार तथा अस्थायी कर्मचारीहरूले लगातार ९ दिनदेखि नगरपालिका कार्यालय र सबै वडाहरूमा तालाबन्दी गरेका छन् । बिहीबार पनि उनीहरूले मुख्य गेटअगाडि टायर बालेर विरोध जनाए ।
विवादको जड मेयर जयसवालले ७० जनाको सट्टा १७० जनाको नाममा तलब निकासा गर्न दबाब दिएको कर्मचारीहरूको आरोप छ । यसमा असहमति जनाउँदै प्रमुख प्रशासकीय अधिकृत गणेश नेपालीले भुक्तानी रोकेका थिए । मेयरले भने अधिकृतले अटेर गरेको दाबी गरेका छन् ।
"हामीले पटक–पटक लिखित र मौखिक आश्वासन पायौं, तर कार्यान्वयन शून्य छ," एक आन्दोलनकारीले भने । तालाबन्दीका कारण जन्मदर्ता, मृत्युदर्ता, सिफारिसलगायत अत्यावश्यक सेवाहरू ठप्प छन् । हजारौं स्थानीय सेवाबाट वञ्चित छन् ।
मेयर जयसवालले वडाध्यक्षहरूले कर्मचारीको हाजिरी, नियुक्तिपत्र र विवरण नबुझाएकाले ढिलाइ भएको बताएका छन् । "म सबैको तलब दिन तयार छु, तर आधारहीन तालाबन्दीले जनता दुःखी छन्," उनको भनाइ छ ।
विगतमा पनि यस्तै विवादले ३१ दिनसम्म तालाबन्दी भएको थियो । कर्मचारीहरूले माग पूरा नभएसम्म आन्दोलन नरोक्ने अडान लिएका छन् ।
