काठमाडौं : सरकारले विभिन्न पाँचवटा विधेयकलाई प्राथमिकतामा राखेको छ । सरकारले प्राथमिकतामा राखेपछि प्रतिनिधि सभाले सोहीअनुसार विधेयक अगाडि बढाउनेगरी प्रतिनिधि सभाको भदौ महिनाको दोस्रो पाक्षिक क्यालेन्डर तय गरेको छ ।
पाक्षिक क्यालेन्डर गर्न बिहीबार सभामुख देवराज घिमिरे र प्रमुख राजनीतिक दलका प्रमुख सचेतक र सचेतकहरू छलफलमा जुटेका थिए । सिंहदरबारस्थित सभामुखको कार्यकक्षमा बसेको बैठकले भदौ महिनाको १५ दिनमा पाँच दिन बस्नेगरी पाक्षिक क्यालेन्डर तय गरेको छ ।
तय भएको क्यालेन्डरअनुसार शुक्रबार बस्ने बैठकले भूमिसम्बन्धी केही नेपाल ऐन संशोधन विधेयक पारित गरेर राष्ट्रिय सभामा पठाउनेछ । राष्ट्रिय सभाले पारित गरेपछि पुनः प्रतिनिधि सभामा आउँछ । सभामुख हुँदै राष्ट्रपतिकहाँ पुग्छ । राष्ट्रपतिले प्रमाणीकरण गरेपछि ऐनमा रूपान्तरित भएर लागू हुन्छ ।
सरकारले प्राथमिकतामा राखेको अर्को विधेयक हो– नागरिकतासम्बन्धी ऐन संशोधन विधेयक । यो विधेयक यही भदौ १८ गते पारित गर्ने सम्भावित कार्यसूची छ । विधेयकमा आमाको नामबाट समेत नागरिकता जारी गर्न सक्नेलगायतका विषय छन् । स्वघोषणा गरेको खण्डमा आमाको नामबाट वंशजको नागरिकता जारी हुने प्रावधान छ । यसले आमाबाट समेत वंश विस्तार हुने बाटो खोल्नेछ ।
भदौ १८ गते नै प्रतिनिधि सभाबाट राष्ट्रपति कार्यालयबाट फिर्ता भएको संवैधानिक परिषद्सम्बन्धी विधेयकमाथि छलफल गरेर पारित गर्ने सम्भावित कार्यसूची तय भएको छ ।
संघीय निजामती सेवा विधेयक भदौ १९ गते पारित गर्ने कार्यसूची छ । हाल यो विधेयक राष्ट्रिय सभामा दफाबार छलफलमा छ । १५ असार २०८२ मा प्रतिनिधि सभाबाट राष्ट्रिय सभामा गएको थियो । यो विधेयक राष्ट्रिय सभाले यही भदौ १६ गते प्रतिनिधि सभामा फर्काइसक्नुपर्ने बाध्यकारी व्यवस्था छ । संविधानतः प्रतिनिधि सभाले पास गरेर पठाएको विधेयक राष्ट्रिय सभाले ६० दिनभित्र फिर्ता गरिसक्नुपर्छ ।
राष्ट्रिय सभाबाट निजामती सेवा विधेयक फिर्ता भएसँगै अगाडि बढाउनेगरी प्रतिनिधि सभाले क्यालेन्डर तय गरेको हो ।
सरकारले विद्यालय शिक्षा विधेयकलाई समेत प्राथमिकतामा राखेको छ । यही भदौ २६ गते विद्यालय शिक्षा विधेयकलाई पारित गर्ने सम्भावित क्यालेन्डर तय भएको छ ।
सरकारको नेतृत्वकर्ता दल नेकपा एमालेका मुख्य सचेतक महेश बर्तौला सरकारले प्राथमिकता तय गरेसँगै सोहीअनुसार विधेयक पारित गर्ने तालिका तय गरिएको बताउँछन् ।
‘महत्वपूर्ण विधेयक पारित गर्नेगरी संसद्को क्यालेन्डर तय भएको छ । संसद् क्यालेन्डरअनुसार नै अगाडि बढ्छ,’ बर्तौलाले सभामुखसँगको छलफलपछि पत्रकारहरूसँग भने ।
उनका अनुसार वर्षे अधिवेशन अन्त्य हुने समय नजिकिँदै गर्दा सरकारले महत्वपूर्ण विधेयक पास गर्न लागेको हो । सरकारले नै प्राथमिकता दिएपछि संसद् कानुन निर्माणमा केन्द्रित भएको छ ।
.jpg)
