काठमाडौं : काठमाडौं महानगरपालिकाका मेयर बालेन्द्र शाह (बालेन) र उपमेयर सुनिता डंगोलबीच लामो समयपछि छलफल भएको छ । छलफलमा मेयर बालेन र उपमेयर डंगोलबीच कार्यपालिका बैठक छिट्टै बोलाउने सहमति बनेको छ ।
उक्त छलफलमा वडा नं. १७ का वडाध्यक्ष नवीन मानन्धर, वडा नं. ३२ का वडाध्यक्ष नवराज पराजुली र वडा नं. १५ का वडाध्यक्ष ईश्वरमान डंगोल पनि सहभागी थिए । उनीहरूको उपस्थितिमा मेयर शाहले कार्यपालिका बैठक चाँडै डाक्ने प्रतिबद्धता जनाएका छन् ।
महानगरले करिब पाँच महिनादेखि कार्यपालिका बैठक बोलाउन सकेको थिएन । अन्तिमपटक गत १४ पुसमा नगरसभाअघि १६औं कार्यपालिका बैठक बसेको थियो । त्यसयता नगरका नीति, कार्यक्रम र बजेट तयारी ठप्पजस्तै थियो ।
महानगरका प्रवक्ता नवीन मानन्धरका अनुसार असार १० भित्र नीति तथा कार्यक्रम सार्वजनिक गर्नुपर्ने कानुनी बाध्यता हुँदाहुँदै पनि अहिलेसम्म तयारी सुरु नभएको अवस्था छ ।
मेयर बालेन शाहले महानगरका प्रशासकीय अधिकृत सरोज गुरागाईंलाई कार्यालयमा हाजिर गर्न रोक लगाएपछि विवाद सुरु भएको थियो ।
गुरागाईंलाई पुरानो बसपार्कस्थित काठमाडौं टावरको नक्सा पासमा अनियमितता गरेको भन्दै बालेनले कार्यालय प्रवेशमा रोक लगाएका थिए । तर भ्रष्टाचार सम्बन्धी कुनै आधिकारिक छानबिन नभएको भन्दै वडाध्यक्षहरू असन्तुष्ट बनेका थिए ।
उपमेयर डंगोलसहित केही वडाध्यक्षले मेयरको निर्देशनविपरीत गुरागाईंलाई कार्यालयमा हाजिर गराएपछि विवाद चुलिएको हो । त्यसपछि कार्यपालिका बैठक माग गर्दै १८ जना वडाध्यक्ष र ५ जना कार्यपालिका सदस्यले ज्ञापनपत्र बुझाए पनि मेयरले बैठक बोलाएका थिएनन् ।
