काठमाडौं : नेकपा एमालेका सांसद भीम आचार्यले बुधबारको प्रतिनिधि सभा बैठकमा बोल्दै क्यानका पदाधिकारीमाथि छानबिन गर्न माग गरेका छन् । टी–२० विश्वकप क्रिकेट प्रतियोगितामा क्यानका पदाधिकारीले गरेका गलत काम गरेको भन्दै छानबिन गर्न माग गरेका हुन् ।  

आचार्यले नेपाली खेलाडीको टोलीमा सन्दीप लामिछानेलाई १५ जनाको टिममा सहभागी नगराएर भिसा पाउनबाट बञ्चित गराएको तथा सपोर्टिङ १० जनाको टोलीमा डाक्टर पठाउनुपर्नेमा एक जना महिलालाई राख्दा आईसीसीले अस्वीकार गरेको बताए । 

उनले ८० डलर पर्ने टिकट १३५ रुपैयाँमा क्यान नेतृत्वले बेचेको भन्दै क्यान नेतृत्वले आर्थिक अपचलन गरेको, नेपाललाई जिताउन नभइ हराउन भूमिका खेलेको र खेलाडीको शिर निहुराउने काम गरेको भनेर खेलाडीबाटै गुनासो आएको पनि बताए । 

त्यस्तै उनले खेलाडीलाई होटलमा उभ्याएको, जर्सी अमेरिका लगेर महँगोमा बेचेको गुनासो आएको तथा अमेरिकामा बस्ने नेपालीहरूसँग अवैधरूपमा चन्दा उठाएर क्यानको खातामा नराखेकोलगायतका अनियमितताका गुनासाहरू व्यापक आएको बताए । 

आचार्यले बुधबारको प्रतिनिधि सभा बैठकमा बोल्दै क्यानका पदाधिकारीमाथि छानबिन गर्नुपर्ने र यस्ता गलत आचरण रोक्नुपर्ने मागसहित दोषीलाई कारबाही गर्न सरकारको ध्यानाकर्षण गराए ।