जेद्दा : जेद्दास्थित नेपाली महावाणिज्यदूतावासले नेपाली श्रमिकको हकहित, अधिकार र सुरक्षालाई प्राथमिकतामा राख्दै कार्यस्थल तथा श्रमिकको बसोबास क्षेत्रमै पुगेर सचेतनामूलक तथा अन्तरक्रियात्मक कार्यक्रम सञ्चालन गरेको छ । महावाणिज्यदूतावासको आयोजनामा शुक्रबार, २१ अगस्ट २०२६ मा जेद्दास्थित अल–खुम्रा (ग्विजेन) क्षेत्रमा कार्यरत नेपाली श्रमिक तथा स्थानीय नेपाली समुदायका अगुवाहरूको सहभागितामा कार्यक्रम सम्पन्न भएको हो । 

श्रमिकहरूलाई उनीहरूकै कार्यस्थल तथा बसोबास क्षेत्रमै पुगेर प्रत्यक्ष रूपमा संवाद गर्ने उद्देश्यले आयोजित कार्यक्रममा गैरआवासीय नेपाली संघका प्रतिनिधि, स्थानीय सामाजिक संस्थाका पदाधिकारी तथा ठूलो संख्यामा नेपाली श्रमिकहरूको सहभागिता रहेको थियो । कार्यक्रममा साउदी श्रम कानुन, रोजगार सम्झौता, श्रमिकका हक–अधिकार, कर्तव्य तथा कानुनी प्रावधानबारे जानकारी प्रदान गरिएको थियो । 

महावाणिज्यदूतावासले साउदी अरबमा श्रमिकका लागि महत्वपूर्ण मानिने ‘अब्सेर’ र ‘किवा’ जस्ता डिजिटल प्रणालीको प्रयोग, अनलाइन सेवाको उपयोग तथा त्यसबाट प्राप्त हुने सुविधाबारे समेत व्यावहारिक जानकारी दिएको थियो । वैदेशिक रोजगारीमा रहेका नेपाली श्रमिकका लागि सामाजिक सुरक्षा कोषको महत्व, दर्ता प्रक्रिया तथा उपलब्ध सुविधाबारे पनि सहभागीलाई जानकारी गराइएको थियो ।

कार्यक्रमलाई केवल जानकारी दिने औपचारिक कार्यक्रमका रूपमा सीमित नगरी श्रमिकका वास्तविक समस्या सुन्ने र समाधानका लागि आवश्यक सहजीकरण गर्ने अन्तरक्रियात्मक मञ्चका रूपमा अघि बढाइएको थियो । सहभागी श्रमिकहरूले कार्यस्थल तथा वैदेशिक रोजगारीका क्रममा भोगेका समस्या, जिज्ञासा र अनुभवहरू प्रत्यक्ष रूपमा राखेका थिए । ती प्रश्न तथा समस्यामाथि महावाणिज्यदूतावासका प्रतिनिधिहरूले आवश्यक परामर्श तथा प्रक्रियागत जानकारी प्रदान गरेका थिए ।

कार्यक्रममा स्थानीय नेपाली समुदायका अगुवाहरूको भूमिकालाई समेत विशेष महत्व दिइएको थियो । श्रमिकले भोग्ने सामान्य समस्या स्थानीय स्तरमै पहिचान गरी आवश्यक समन्वय र सहजीकरणमार्फत समाधानतर्फ लैजान समुदायका अगुवाहरू सक्रिय हुनुपर्नेमा जोड दिइएको थियो ।

श्रमिकसम्म सेवा र सूचना पु¥याउने आफ्नो प्रयासलाई महावाणिज्यदूतावासले डिजिटल माध्यममार्फत पनि निरन्तरता दिँदै आएको छ । राहदानी, कन्सुलर सेवा, वैदेशिक रोजगारी तथा अन्य समस्या वा गुनासोका सम्बन्धमा महावाणिज्यदूतावास, जेद्दाको आधिकारिक ह्वाट्सएप नम्बर ०५३१२५४०९९ मा सम्पर्क तथा सन्देश गर्न सकिने जनाइएको छ ।

महावाणिज्यदूतावासको कार्यालय भिल्ला नं. ३३, कुत्न बिन हारिथाह सडक, अल मुहम्मदिया जिल्ला (१), जेद्दा, साउदी अरबमा रहेको छ ।

कार्यस्थलमै पुगेर नेपाली श्रमिकका समस्या सुन्ने, अधिकारबारे जानकारी दिने र आवश्यक सेवामा पहुँच सहज बनाउने महावाणिज्यदूतावासको यस्तो पहललाई साउदी अरबमा कार्यरत नेपाली श्रमिकको हितमा महत्वपूर्ण कदमका रूपमा हेरिएको छ ।