काठमाडौं : गत असोज ३१ गतेबाट सार्वजनिक प्रदर्शनमा आएको फिल्म 'जेरी अन टप' २०८२ सालको सर्वाधिक कलेक्सन गर्ने फिल्म बन्न सफल भएको छ । घरेलु बक्सअफिसमा बुधबारसम्म फिल्मले ११ करोड ४३ लाख माथिको कलेक्सन गरेको छ ।
गत वैशाख अन्तिम साता प्रदर्शनमा आएको फिल्म 'ऊनको स्वीटर' नेपाली बक्सअफिसमा ११ करोड ३४ लाख कलेक्सन गर्दै पहिलो नम्बरमा थियो । 'जेरी अन टप'ले प्रदर्शनको २०औं दिनमा त्यो आँकडा पूरा गर्दै यो वर्षकै सर्वाधिक कलेक्सन गर्ने फिल्मको सूचीमा आफूलाई पहिलो नम्बरमा पुर्याएको हो । फिल्म अहिलेपनि देशभरका सय बढी हलमा प्रदर्शनरत छ ।
अभिनेता अनमोल केसीको स्टारडमले इनिसियल विजनेसमा छलाङ मारेको यो फिल्मलाई दर्शकको 'वर्ड अफ माउथ'ले लामो रेसको घोडाको रूपमा उभ्याएको हो । सुयोग गुरुङ निर्देशित सामाजिक, पारिवारिक र प्रेमिल कथाको समिश्रण 'जेरी अन टप'ले देशकै पहिचान बोकेको सगरमाथाको कथालाई बलियोसँग प्रस्तुत गरेको छ ।
हिमाल आरोहणको साहसिक कथा उठान गरेको यो फिल्मले देशको पर्यटनलाई समेत अन्तर्राष्ट्रिय स्तरमा पुर्याउन महत्वपूर्ण भूमिका खेलेको भन्दै सामाजिक सञ्जालमा प्रशंसा बटुलिरहेको छ । फिल्ममा अनमोल केसी, आँचल शर्मा, जसिता गुरुङ, भुवन केसी, केदार घिमिरे, उषा खड्गी प्रमुख अभिनयमा छन् ।
अनन्या फिल्मस्'को ब्यानरमा सरोज न्यौपानेको प्रस्तुतिमा तयार फिल्मले अन्तर्राष्ट्रिय बजारमा पनि प्रसंशा बटुलिरहेको छ । अष्ट्रेलिया, अमेरिका, जापानसहित युरोपका विभिन्न मुलुक गरी दर्जनौं देशमा एकसाथ प्रदर्शनमा रहेको फिल्मले ग्लोबल बक्सअफिसमा हालसम्म १७ करोड कलेक्सन गरिसकेको निर्माता न्यौपानेले बताए ।
