रौतहट : काठमाडौं महानगरपालिकाका मेयर बालेन शाह र हामी नेपाल संस्थाका प्रमुख सुदन गुरुङविरुद्ध जिल्ला प्रहरी कार्यालय गौरमा उजुरी दर्ता गरिएको छ । युवा संघका केन्द्रीय सदस्य बजरंगी गुप्ता र जिल्ला इन्चार्ज सन्तोषकुमार साहको नेतृत्वमा युवाहरूले सोमबार उक्त उजुरी दर्ता गराएका हुन् ।
उजुरीमा गत भदौ २३ र २४ गते भएको जेनजी आन्दोलनका क्रममा मेयर शाह र गुरुङले भीडलाई उक्साएर रौतहटलगायत देशका विभिन्न स्थानमा सरकारी तथा निजी सम्पत्तिमा तोडफोड, आगजनी र लुटपाट गरेको आरोप लगाइएको छ । मुलुकी फौजदारी संहिता २०७४ को दफा २८५(२) बमोजिम अपराध गरेको दाबी गर्दै उनीहरूलाई कानुनी कारबाहीको माग गरिएको छ ।
यसअघि युवा संघका कार्यकर्ताहरूले गौरमा मोटरसाइकल र्याली निकालेर विरोध प्रदर्शन गरेका थिए । बजरंगी गुप्ताले मेयर शाह र गुरुङले “अदृश्य शक्तिको आडमा” देशभर हिंसा र अराजकता फैलाएको आरोप लगाउँदै तत्काल कानुनी कारबाही गर्नुपर्ने माग गरेका छन् ।
जेनजी आन्दोलनका क्रममा रौतहटमा दर्जनौं सरकारी कार्यालय र निजी घरहरूमा आगजनी, तोडफोड र लुटपाट भएको थियो । जिल्ला प्रहरी कार्यालयले उजुरी प्राप्त भएको जनाउँदै आवश्यक प्रक्रिया अघि बढाउने बताएको छ ।
