रौतहट : रौतहट प्रहरीले पत्रकार प्रकाश श्रेष्ठलाई धम्की दिएको आरोपमा एक व्यवसायीलाई पक्राउ गरेको छ । फोनमार्फत पत्रकार श्रेष्ठलाई गालीगलौज गरी कुटपिट गर्ने धम्की दिएको आरोपमा कटहरिया नगरपालिका वडा नंं.५ का स्थानीय रामचन्द्र साह कलवारलाई पक्राउ गरेको हो । 

रेडियोमा समाचार प्रशारण गराएको विषयलाई लिएर साहले नेपाल पत्रकार महासंघ जिल्ला कार्य समितिका सदस्य समेत रहेका कटहरिया म्युजिकल एफएमका प्रबन्ध निर्देशक श्रेष्ठलाई फोनमार्फत अपशब्द प्रयोग गर्दै धम्की दिएको आरोप लागेको छ । 

जहरीमाई कृषि सहकारी संस्थाका संचालक समेत रहेका कलवारले कालोबजारी गर्दै आएको समाचार रेडियोमा प्रसारण भएको थियो । तीन वटा सहकारीका संचालक समेत रहेका कलवारले अनुदानमा आएको रासायनिक मल लक्षित वर्गलाई नदिइ बढी रकम लिएर कालोबजारी गर्दै आएको आरोप लागेको छ । 

धम्की दिएको विषयमा पत्रकार महासंघ रौतहटले समेत विज्ञप्ति जारी गर्दै कारबाहीको माग गरेको थियो । पक्राउ परेका व्यवसायी अहिले इलाका प्रहरी कार्यालय गरुडाको नियन्त्रणमा रहेका र घटनाबारे थप अनुसन्धान भइरहेको डीएसपी राजन कार्कीले जानकारी दिए ।