रौतहट : रौतहट जिल्लामा जेनजी आन्दोलनको क्रममा भएको हिंसात्मक प्रदर्शनले करिब २० करोडभन्दा बढीको भौतिक क्षति भएको प्रारम्भिक अनुमान गरिएको छ । जिल्ला प्रशासन कार्यालय गौरले क्षतिको पूर्ण विवरण संकलनको काम जारी राखेको बताएको छ, जसले यो रकम अझै बढ्न सक्ने संकेत गरेको छ ।

आन्दोलनकारीहरूले जिल्लाका ६ वटा स्थानीय तहका कार्यालयहरू र दर्जनौं सरकारी संरचनामा आगजनी र तोडफोड मच्चाएका छन् । चन्द्रपुर, गरुडा र फतुवा विजयपुर नगरपालिकाका कार्यालयहरू पूर्णरूपमा ध्वस्त भएका छन् भने गौर, बौद्धिमाई र कटहरिया नगरपालिकामा व्यापक नोक्सानी भएको छ ।

गौर नगरपालिकामा ६४ लाख, जिल्ला प्रशासन कार्यालयमा ९ लाख, चन्द्रपुर नगरपालिकामा ३ करोड, मौलापुर नगरपालिकामा ५ करोड र कटहरिया नगरपालिकामा १ करोडको क्षति भएको प्रारम्भिक विवरणले देखाएको छ ।

यस्तै, डिभिजन वन कार्यालयमा २ करोड ५० लाख, प्रदेश लेखा कार्यालयमा २ करोड ६० लाख र फतुवा विजयपुर नगरपालिकामा ३० लाखको नोक्सानी भएको अनुमान छ । अन्य कार्यालयहरू जस्तै रौतहट जिल्ला अदालत, राष्ट्रिय अनुसन्धान कार्यालय, करदाता कार्यालय गौर, गौर कारागार, मालपोत कार्यालय चन्द्रपुर, नापी कार्यालय गरुडा र वृन्दावन वडा कार्यालयमा पनि लाखौंको क्षति भएको छ ।

प्रहरी संरचनाहरू पनि आन्दोलनको चपेटामा परेका छन् । जिल्ला प्रहरी कार्यालय गौरका अनुसार, जिल्लाभरका ८ वटा प्रहरी युनिटमा आगजनी र तोडफोड भएको छ । इलाका प्रहरी कार्यालय चन्द्रनिगाहपुरमा सबैभन्दा ठूलो क्षति भएको छ, जहाँ २ करोड १४ लाख बराबरको नोक्सानी भएको छ ।

यस्तै, इलाका प्रहरी गरुडा, शिवनगर, हर्षाहा, सुकदेवाचौक, बंकुल र चन्द्रपुर तल्लो बजार प्रहरी चौकीमा पनि हजारौंदेखि लाखौंको क्षति भएको छ । जिल्ला प्रहरी कार्यालय गौरमा करिब ९० हजारको नोक्सानी भएको प्रहरीले जनाएको छ ।

जिल्ला प्रहरी कार्यालय गौरका नायब उपरीक्षक राजु कार्कीले सबै प्रहरी युनिटले कठिन परिस्थितिमा पनि सेवा पुनः सुचारु गरेको बताए । विशेषगरी, भवनविहीन बनेको इलाका प्रहरी कार्यालय चन्द्रनिगाहपुरले बाहिरैबाट भए पनि काम सुरु गरेको छ ।

यो ठूलो क्षतिले स्थानीय प्रशासन र सरकारी संरचनालाई पुनर्स्थापना गर्न ठुलो चुनौती थपिएको छ । जिल्ला प्रशासनले क्षतिको पूर्ण विवरण संकलन गरिरहेको छ, र आगामी दिनमा पुनर्निर्माण र सेवा सुचारु गर्न विशेष योजना आवश्यक पर्ने देखिन्छ ।