काठमाडौं : संघीय संसद् अन्तर्गत प्रतिनिधि सभाका सभामुख देवराज घिमिरे र राष्ट्रिय सभाका अध्यक्ष नारायणप्रसाद दाहालले देशमा उत्पन्न हालको राजनीतिक संकटको समाधान संविधान र विधिको शासनबाटै खोज्नुपर्नेमा जोड दिएका छन् ।
शुक्रबार संयुक्त विज्ञप्ति जारी गर्दै उनीहरूले आन्दोलनरत पक्षका माग सम्बोधन गर्दै अझ उन्नत, समृद्ध र बलियो लोकतन्त्र निर्माणमा सबै दल प्रतिबद्ध हुनुपर्ने आवश्यकता औंल्याएका छन् ।
विज्ञप्तिमा भनिएको छ, “विद्यमान विषम परिस्थितिमा जनतामा निहित सार्वभौमसत्ता, नागरिक स्वतन्त्रता, भौगोलिक अखण्डता, राष्ट्रिय एकता र स्वाधीनतालाई शिरोपर गर्दै संवैधानिक प्रक्रियाबाटै निकास दिन सम्माननीय राष्ट्रपतिज्यूले पहल गरिरहनुभएको छ । यस सन्दर्भमा विधिको शासन र संविधानवादबाट बाहिर जानु हुँदैन भन्नेमा हामी दृढ छौं ।”
साथै, सभामुख घिमिरे र अध्यक्ष दाहालले जेनजी आन्दोलनका क्रममा २३ र २४ भदौमा भएको जनधनको क्षतिप्रति गहिरो दुःख व्यक्त गरेका छन् । विज्ञप्तिमार्फत उनीहरूले आन्दोलनमा ज्यान गुमाएका युवाप्रति श्रद्धाञ्जली अर्पण गरेका छन् ।
भदौ २३ र २४ गते भएको जेनजी आन्दोलनपछि तत्कालीन प्रधानमन्त्री केपी शर्मा ओलीले पदबाट राजीनामा दिएका थिए । हाल अन्तरिम सरकार गठनका विषयमा छलफल भइरहेको छ ।
