काठमाडौं : मारवाडी सेवा समिति नेपालअन्तर्गत सञ्चालित पशुपति गौशाला धर्मशालाले निःशुल्क कृत्रिम खुट्टा वितरण गरेको छ ।
विभिन्न कारणबाट खुट्टा गुमाई अपाङ्गता जीवन बिताइरहेका सातजना व्यक्तिहरूलाई सहज जीवन निर्वाह गर्नको लागि कृत्रिम खुट्टा वितरण गरिएको पशुपति गौशाला धर्मशालाका अध्यक्ष रमेश तापडियाले जानकारी दिएका छन् ।
धर्मशालाले शनिबार कृत्रिम खुट्टा वितरण कार्यक्रमको आयोजना गरेर सिन्धुपाल्चोक जिल्लाका किउल गाउँपालिकाका ललित सिलवाललाई कृत्रिम दायाँ खुट्टा प्रदान गरेको थियो । त्यस्तै दोलखा जिल्लाका गौरीशंकर गाउँपालिकाका प्रेमबहादुर खत्री, सप्तरी जिल्लाका हनुमाननगर कंकालिनी नगरपालिकाका विष्णु मण्डल, काठमाडौंका गोपीकृष्ण यादव, बाजुराका पूर्ण थापा, कैलालीका गोपीराज जैसी, सिराहाका जोगी यादव र दीपक सुवेदीलाई कृतिम खुट्टा वितरण गरिएको थियो । महँगो पैसा पर्ने कृत्रिम खुट्टा धर्मशालाले निःशुल्क रुपमा दिँदा निकै खुसी भएको बताएका थिए ।
तापडियाका अनुसार हालसम्म ७ हजार कृत्रिम खुट्टा वितरण गरिसकिएको छ । गौशाला धर्मशालाका अध्यक्ष रमेश तापडियाको अध्यक्षतामा भएको कार्यक्रमका प्रमुख अतिथि समाजसेवी एवं व्यवसाय जैनरत्न किशनलाल दुगडले सेवा नै धर्म मानेर सामाजिक कार्यमा लागेको बताएका थिए । सेवा गर्नु जतिको ठूलो आत्मसन्तुष्टि अरुमा नभएको उनको भनाइ थियो ।
कार्यक्रमका विशिष्ट अतिथि राष्ट्रिय ताल संरक्षण विकास समितिका अध्यक्ष ध्रुव उप्रेतीले मारवाडी सेवा समिति नेपाल पशुपति गौशाला धर्मशालाले धेरै पुण्यको काम गर्दै आएको प्रशंसा गरेका थिए ।
