काठमाडौं : सिद्धार्थ बैंक नेपाल प्रिमियर लिग (एनपिएल)मा कर्णाली याक्सले विजयी सुरुवात गरेको छ । मंगलबार भएको खेलमा जनकपुर बोल्ट्सलाई १९ रनले पराजित गर्दै कर्णालीले विजयी सुरुवात गरेको हो । कर्णालीले दिएको १३३ रनको लक्ष्य पछ्याएको जनकपुर १९.३ ओभरमा सबै विकेट गुमाउँदै ११३ रनमा समेटियो ।

जनकपुरका लागि अभिषेक तिवारीले सर्वाधिक २० रन बनाए । माइन अली र हरमित सिंहले समान १९–१९ रनको योगदान दिए । जिमी निसमले १५ रन तथा मयन यादवले १४ रन बनाए । यसबाहेक जनकपुरका अन्य ब्याटरले दोहोर अंकमा रन बनाउन सकेनन् ।

कर्णालीका लागि युनिस ठाकुर र हुसेन तलतले समान ३–३ विकेट लिए । नन्दन यादवले २ विकेट लिँदा सोमपाल कामीले १ विकेट लिए ।

त्यसअघि कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको कर्णालीले निर्धारित २० ओभरमा ९ विकेट गुमाउँदै १३२ रनको योगफल बनाएको थियो ।

कर्णालीका लागि अरिफुल इस्लामले सर्वाधिक ४३ रन बनाए । उनले २९ बलमा चार छक्का प्रहार गरे । त्यस्तै पवन सर्राफले ३७ रनको योगदान दिए । उनले ३७ बलमा तीन छक्का प्रहार गरे । दीपक डुम्रेले पाँच बलमा दुई छक्कासहित १३ रन बनाए भने गुल्सन झाले १२ रन जोडे ।

जनकपुर बोल्ट्सका बलर हरमित सिंहले उत्कृष्ट प्रदर्शन गर्दै चार ओभरमा २२ रन खर्चेर तीन विकेट लिए । राहुल यादवले चार ओभरमा १५ रन दिएर दुई विकेट लिए भने मोइन अलीले पनि दुई विकेट हात पारे ।