स्याङ्जाका टंक लम्साल युरोपबाट कांग्रेसको केन्द्रीय सदस्यमा प्रतिस्पर्धा गर्दै

काठमाडौं : स्याङ्जा जिल्ला निवासी टंक लम्साल विगत २५ वर्षदेखि जर्मनीमा व्यवसाय गर्दै आएका सफल उद्यमी हुन् । उनले नेपाली कांग्रेसको १५औं महाधिवेशनमा युरोप क्षेत्रबाट केन्द्रीय सदस्यमा उम्मेदवारी दिएका छन् ।

सामान्य ग्रामीण परिवेशबाट संघर्ष सुरु गरेका उनले सन् २००१ मा जर्मनी पुगेर साना कामबाट अनुभव बटुल्दै 'मेरो बुद्ध नेपाली किचन' र 'कुलायन' जस्ता रेस्टुरेन्ट सञ्चालनमा ल्याएका छन् । जहाँ उनले नेपाली खाना र संस्कृतिको प्रवर्द्धन गर्नुका साथै युरोप पुग्ने नेपालीलाई आश्रय र रोजगारी प्रदान गर्दै आएका छन् ।

विद्यार्थीकालदेखि नै राजनीतिमा सक्रिय लम्साल प्रवासमा पनि नेपाली कांग्रेस र जनसम्पर्क समितिमा निरन्तर क्रियाशील छन् । सोही योगदानका आधारमा १५औं महाधिवेशन प्रतिनिधि बनेका उनले विदेशमा सिकेको ज्ञान र सीप देश विकासमा लगाउने बताएका छन् । यही उद्देश्यका साथ उनी आगामी ५ वर्षभित्र पूर्णतः नेपाल फर्किने योजनामा छन् ।

देश फर्केर उद्यमशीलता र समाजसेवामा समर्पित हुने लक्ष्य राखेको उनले बताए ।