काठमाडौँ : हेटौँडा उपमहानगरपालिका-११ स्थित बाल सुधार गृह तोडफोड गरेर भागेका ७२ जनामध्ये ४१ जना बाल बन्दीलाई फर्काइएको छ ।
हिजो बुधबार र आज बिहीबार गरेर भागेकाहरू ७२ जनामध्ये ४१ जनालाई नियन्त्रणमा लिइएको बाल सुधार गृहले जनाएको छ । सुधार गृहका अनुसार भागेकामध्ये २ जना आफैँ फर्किएका हुन भने बाँकीलाई प्रहरीले नियन्त्रणमा लिएर बाल सुधार गृहको जिम्मा लगाएको थियो ।
३१ जना अझै फरार रहेको बताइएको छ । १० देखि १५ जना बाल बन्दीहरू परिवारको सम्पर्कमा समेत नआएको अभिभावकहरूले सुधार गृहलाई जानकारी गराएका छन् ।
