अर्घाखाँची : नेपालकै ठुलो शितगंगा नगरपालिकामा सरसफाइ तथा हरियाली प्रवर्धन अभियान सुरु भएको छ । नगरपालिकालाई सुन्दर र हरियालीयुक्त बनाउनका लागि शनिबारदेखि नयाँ अभियानको थालनी गरिएको नगरपालिकाले जनाएको छ ।
विकासको दृष्टिले पछाडि परेको र अर्घाखाँचीको कणाली भनेर चिनिने शितगंगा नगरपालिका सरसफाइमा समेत पछि परिरहेको स्थानीयवासीको भनाइ छ ।
व्यवस्थित फोहोर राख्ने डम्पिङ साइट निर्माण गर्न नसक्दा नगरपालिकाले अस्थायी रूपमा सन्धिखर्क–गोरुसिंगे सडकखण्ड अन्तर्गत ठाडाको तलपट्टि फोहर फाल्ने गरेको र यसले राजमार्गमा दुर्गन्ध बढाएको गुनासो स्थानीयहरूले गर्दै आएका छन् ।
नयाँ प्रमुख प्रशासकीय अधिकृत कृष्णप्रसाद सापकोटाको आगमनसँगै सुरु गरिएको सरसफाइ र हरियाली प्रवर्धन अभियानले दीर्घकालीन महत्व राख्ने अपेक्षा गरिएको नगरप्रमुख छबिलाल पौडेलले बताए ।
अभियान महिनाको दुई पटक सञ्चालन हुने जनाउँदै प्रमुख प्रशासकीय अधिकृत सापकोटाले प्रत्येक महिनाको १ र १५ गते कार्यक्रम सञ्चालन हुने र अन्य सरोकारवाला निकाय तथा संघ–संस्थाले दैनिक सरसफाइमा सहयोग गर्ने जानकारी दिए ।
उनले यो अभियानलाई स्वयम्सेवी भावनाले अगाडि बढाइने दाबी गरे । नगरप्रमुख पौडेलका अनुसार आफ्नो नगर सुन्दर र हरियाली बनाउन नगरबासीले पनि सक्रिय रूपमा अभियानमा जोडिनु आवश्यक छ ।
सरसफाइको नाममा वर्षेनी लाखौँ खर्च भए पनि ठोस प्रगति नदेखिने परम्परा यसपटक अन्त्य हुने अपेक्षा गरिएको छ । उपप्रमुख गिता भाटका अनुसार ‘म सफा गर्छु, मेरो नगर अभियान’ लाई यस आर्थिक वर्षमा निरन्तरता दिइनेछ ।
नगरपालिकाका योजना महाशाखा प्रमुख प्रशासकीय अधिकृत नुमलाल खनालले विभिन्न संघसंस्थाले केही दिनमै सकिने अभियानमा लाखौँ खर्च गर्ने प्रथालाई रोक्दै यस अभियानलाई दिगो रूपमा अगाडि बढाउने जनाए । यसबीच, वडा नम्बर ३ ले बजार क्षेत्रमा सरसफाइमा जिल्लामै नमुना काम गर्दै आएको र वडा नम्बर ४ ले सरसफाइमा बेवास्ता गर्नेहरूमाथि सिफारिस रोक्कासम्मको कठोर कदम चालेको वडाध्यक्षहरूले बताए ।
नगरपालिकाले प्रत्येक परिवारलाई आफ्ना घर, आँगन र वरिपरि सरसफाइ गर्न प्रोत्साहन गर्ने र सडक, गल्ली तथा सार्वजनिक स्थल सफा राख्नेहरूलाई सहयोग र पुरस्कार दिने कार्यविधि बनाउन लागेको प्रमुख प्रशासकीय अधिकृत सापकोटाले जानकारी दिए ।
साथै, टोल, चौक, पार्क, पोखरी, मन्दिर, चौतारो जस्ता सार्वजनिक स्थल सफा राखेर समुदायलाई रमाइलो र सुरक्षित बनाउने योजना समेत अघि बढाइएको छ ।
नगरप्रमुख पौडेलका अनुसार शितगंगाको ऐतिहासिक, व्यापारिक र आर्थिक महत्वलाई जोगाउँदै यसलाई पर्यटकीय विश्रामस्थलको रूपमा विकास गर्ने मुख्य लक्ष्य सहित सरसफाइ तथा हरियाली प्रवर्धन अभियान अघि बढाइएको हो । अभियानलाई सफल बनाउन नगरवासी, टोल विकास संस्था, राजनीतिक दल, सामाजिक संघसंस्था र सरोकारवाला निकायलाई साथमा लिएर अगाडि बढाइने नगरप्रमुख पौडेलले बताए ।
अभियान अन्तर्गत मुख्य सडक क्षेत्रमा सघन सरसफाइसँगै विभिन्न प्रजातिका फूल र हरियाली दिने बिरुवा रोप्ने कार्य पनि अघि बढाइने नगरपालिकाले जनाएको छ ।
