काठमाडौँ : नेपाल कम्युनिष्ट पार्टी (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपालले प्रेस स्वतन्त्रताको रक्षा हुनुपर्नेमा जोड दिएका छन् ।
समाजवादी प्रेस संगठन केन्द्रीय कमिटीको तेस्रो बैठकको आज यहाँ शुभारम्भ गर्दै उनले संघीय लोकतान्त्रिक गणतन्त्रात्मक शासन व्यवस्थालाई बलियो बनाउन पूर्ण प्रेस स्वतन्त्रता आवश्यक छ भने ।
निरङ्कुशताविरुद्धका सबै आन्दोलनमा सञ्चार क्षेत्रले महत्त्वपूर्ण भूमिका निर्वाह गरेको उनले स्मरण गर्दै नेता नेपालले देशको आर्थिक तथा सामाजिक रूपान्तरणका लागि सञ्चार जगत्ले काम गर्नुपर्ने बताए ।
संगठन प्रमुख प्रकाश ज्वालाले राज्यको मूल प्रवाहमा समाहित नभएका अल्पसङ्ख्यक, सीमान्तकृत वर्ग र समुदायका पक्षमा पनि पत्रकारले कलम चलाउनुपर्ने विचार व्यक्त गरे ।
त्यस अवसरमा विश्व प्रेस काउन्सिलका नवनिर्वाचित उपाध्यक्ष किशोर श्रेष्ठलाई सम्मान पनि गरिएको थियो ।
