काठमाडौँ : सरकारी अस्पतालहरूमा बहिरंग (ओपीडी) सेवा अब आइतबार पनि बन्द रहने व्यवस्था पुनः लागू गरिएको छ । 

यसअघि दुई दिन सार्वजनिक बिदा कायम हुँदा सेवा प्रभावित हुने भन्दै आइतबार ओपीडी सञ्चालन गर्न स्वास्थ्य तथा जनसंख्या मन्त्रालयले अस्पतालहरूलाई अनुरोध गरेको थियो ।

तर चिकित्सक संघले आइतबार ओपीडी सेवा सञ्चालन गर्न असमर्थता जनाएपछि मन्त्रालयले पूर्ववर्ती व्यवस्था नै कायम रहने निर्णय गरेको हो ।

मन्त्रालयले जारी गरेको सूचनामा सरकारले लागू गरेको हप्तामा दुई दिन बिदासम्बन्धी निर्णयसँग तालमेल मिलाउँदै स्वास्थ्य सेवा निरन्तर र व्यवस्थित रूपमा सञ्चालन हुने प्रबन्ध मिलाइएको उल्लेख छ। साथै, बिरामीको नियमित उपचार र निगरानी प्रभावित नहोस् भन्ने उद्देश्यले आकस्मिक तथा अन्तरंग सेवाहरू २४ सै घण्टा सञ्चालनमा रहने व्यवस्था यथावत् राखिएको छ।

सूचनाअनुसार आइतबारका लागि तय गरिएका शल्यक्रियालगायतका सेवा बिरामीको अवस्था हेरी पुनः तालिका मिलाइनेछ । आपत्कालीन अवस्थामा बिरामीलाई आवश्यक परेमा नजिकको उपयुक्त अस्पतालमा रिफर गर्ने व्यवस्था तथा एम्बुलेन्स सेवा निरन्तर तयारी अवस्थामा रहने मन्त्रालयले जनाएको छ ।

मन्त्रालयले बिदाका दिनमा पनि स्वास्थ्य सेवा अवरुद्ध नहुने गरी आवश्यक प्रबन्ध गर्न अस्पतालहरूलाई निर्देशन दिएको छ । साथै, उपलब्ध सेवासम्बन्धी जानकारी नियमित रूपमा वेबसाइट र सूचना बोर्डमार्फत सर्वसाधारणलाई उपलब्ध गराउन आग्रह गरिएको छ ।