काठमाडौं : भारत भ्रमणमा रहेका सुदूरपश्चिम प्रदेशका मुख्यमन्त्री कमलबहादुर शाह र भारतको उत्तरप्रदेशका मुख्यमन्त्री योगी आदित्यनाथबीच भेटवार्ता भएको छ ।
मुख्यमन्त्री शाह र योगी आदित्यनाथबीच सोममबार लखनऊस्थित सरकारी निवासमा भेटवार्ता भएको हो । बैशाख १६ गतेदेखि भारत भ्रमणमा रहेका मुख्यमन्त्री शाहसहित १० सदस्यीय प्रतिनिधि मण्डलले योगी आदित्यनाथसँग भेटवार्ता गरेको हो ।
मुख्यमन्त्री शाहको नेतृत्वमा १० सदस्यीय टोली भारत भ्रमणमा रहेको छ । बैशाख १६ गते देखि २२ गते भ्रमणको कार्यतालिका रहेको छ ।
मुख्यमन्त्री शाहले भ्रमण क्रममा यसअघि उत्तराखण्डका मुख्यमन्त्री पुष्करसिंह धामी र विभिन्न विभागीय मन्त्रीहरूसँग भेटवार्ता गरिसकेका छन् । भेटवार्तामा दुवै मुख्यमन्त्रीहरूबीच आपसी हित, विकास निर्माणमा सहकार्य तथा सुदूरपश्चिम प्रदेशको विकास निर्माण भारतीय सहयोगबारे छलफल भएको छ ।
सुदूरपश्चिम र उत्तरप्रदेशबीच सीमा क्षेत्रमा हुने गतिविधि तथा भारतको तिकुनियाँबाट सीमावर्ती खक्रौलासम्मको सडक निर्माणका विषयमा समेत छलफल भएको भ्रमण टोलीमा रहेका मुख्यमन्त्री शाहका राजनीतिक सल्लाहकार डा. जितेन्द्र उपाध्यायले बताए ।
