काठमाडौं : बालसाहित्यले सामाजिक सद्भाव, सांस्कृतिक अन्तर्घुलन, प्रकृतिसँग तादात्म्य, श्रमप्रति सम्मान भाव, आत्मविश्वास जस्ता अनेकौं पाटामा सकारात्मक परिवर्तन ल्याउन सक्छ । बालसाहित्यले उनीहरूको जीवनपद्धति सभ्य शिष्ट भइ सोच्ने क्षमता बढाउँछ । प्राणीहरूप्रति सहिष्णु रहेर देशप्रेमी भावना जागृत गराउँछ । सिर्जना र साहित्य कहिल्यै पनि बासी हुन्न, त्यसमाथि बालसाहित्य सदाबहार हुने गर्दछ ।
यही सदाबहार साहित्यको रूपमा रहेको बालसाहित्यप्रति पछिल्लो पुस्ताकी लेखिका सिर्जना राईको कृति ‘साङ्केनको खुलदुली’ले सर्वोत्कृष्ट बालपुस्तक लेखन पुरस्कार प्राप्त गरेको छ । कोपिला किताबबाट प्रकाशित पुस्तक ‘साङ्केनको खुलदुली’ले २०७९ सालको नेपाल बालसाहित्य समाज सर्वोत्कृष्ट बालपुस्तक लेखन पुरस्कार प्राप्त गरेको हो ।
गीति लेखनमा समेत आफूलाई अब्बल सावित गरिसकेकी खोटाङकी स्रष्टा सिर्जना राईले आफ्नो शब्द, संगीत र स्वरमा लोकप्रिय गायक राजेशपायल राईसँग सहकार्य गरिसकेकी छन् । बुवा टेक बहादुर राई र आमा इन्द्रकुमारी राईको ४ सन्तानमध्यकी कान्छी सन्तान सिर्जना खोटाङको दिप्लुङ १ केराबारी, ‘जन्तेढुङ्गा ६’ मा जन्मेर पढाईको सिलसिलामा राजधानी प्रवेश गरेकी थिइन् । उनले पढाइसँगै गीत, संगीत र साहित्य लेखनलाई पनि निरन्तरता दिदै आइरहेकी छन् ।
छापा र डिजिटल सञ्चारमाध्यममा सञ्चारकर्मको अनुभव बटुलेकी सिर्जनाका कविता २०७७ सालको प्रदेश नं १ नानी श्रष्टाहरुको संयुक्त कविता संग्रह अजम्बरी अक्षरहरुमा ‘मानवताको खोजी’ समावेस रहेको छ । आयोजक संस्था नेपाल बालसाहित्य समाजका अनुसार निकट भविष्यमै एक कार्यक्रमको आयोजना गरी पुरस्कृत श्रष्टाहरुलाई सम्मान तथा पुरस्कार प्रदान गरिने छ ।
