रौतहट : उपेन्द्र यादव नेतृत्वको जनता समाजवादी पार्टी (जसपा) नेपालले भूमिसम्बन्धी विधेयकविरुद्ध रौतहटको सदरमुकाम गौरमा प्रदर्शन गरेको छ । वर्षातका बीचमा पनि जसपाका कार्यकर्ताले नाराबाजीसहित सडकमा उत्रिएर विरोध जनाएका थिए ।
जसपाले सुरुदेखि नै सो विधेयकको विरोध गर्दै आएको छ । यो विधेयक भूमिहीन र सर्वसाधारणको हितमा नभई भू–माफिया र जग्गा दलालको फाइदाका लागि ल्याइएको जसपा नेपालको आरोप छ । जसपा नेपालले यसबाट वनजंगल विनाश भई तराई–मधेश मरुभूमिकरण हुने चेतावनी पनि दिएको छ ।
सो विधेयक प्रतिनिधि सभाबाट पारित भइसकेको छ । तर राष्ट्रिय सभाबाट जसपा नेपालको समर्थनबिना पारित हुन कठिन देखिने विश्लेषण गरिएको छ । यसअघि सत्तारुढ दलसँग सहमति नजुटेपछि जसपा नेपालले सरकारलाई दिएको समर्थन फिर्ता लिएको थियो ।
पार्टीको केन्द्रीय कार्यक्रमअनुसार गौरमा आयोजित प्रदर्शन मधेशी क्रान्ति चोकबाट जुलुसका रूपमा सुरु भई नगर परिक्रमा गर्दै पुनः सोही चोकमा कोणसभामा परिणत भएको थियो ।
कोणसभालाई सम्बोधन गर्दै जसपा नेपालका नेता तथा पूर्वराज्यमन्त्री योगेन्द्र यादवले भूमि विधेयक मधेशको मौलिकता र अस्तित्वविरुद्ध रहेको आरोप लगाए । उनले भूमिहीनलाई लाभ हुने नाममा सरकारी तथा सार्वजनिक जग्गा मास्ने, निजीकरणलाई प्रोत्साहन गर्ने र तराईलाई मरुभूमि बनाउने खतरनाक योजना भएको बताए। यादवले विधेयक खारेज गर्न दबाब दिन निरन्तर आन्दोलन आवश्यक रहेको उल्लेख गरे ।
