काठमाडौँ : झापाको कन्काई नगरपालिका-८, बिरिङ पुलमा पिकअप भ्यान र मारुती भ्यान ठोक्किँदा एक जनाको मृत्यु भएको छ भने चार जना घाइते भएका छन् ।
इलाका प्रहरी कार्यालय, बिर्तामोडका अनुसार राति ८:४० बजे पूर्वपश्चिम राजमार्गमा मंगलवार दुई वटा सवारी साधन एक आपसमा ठोक्किएर दुर्घटना भएको थियो ।
दुर्घटनामा सुरुंगाबाट बिर्तामोडतर्फ आउँदै गरेको मे १ च ५४४६ नम्बरको पिकअप भ्यान र विपरीत दिशाबाट गइरहेको मे १ च ३४४० नम्बरको मारुती भ्यान ठोक्किएका थिए ।
दुर्घटनामा गम्भीर घाइते भएका मारुती भ्यानका चालक शिवसताक्षी–७ का २९ वर्षीय नवराज बाँस्कोटालाई तत्काल उद्धार गरी बीएन्डसी अस्पताल पुर्याइएको थियो । तर, चिकित्सकहरूले उनलाई मृत घोषित गरेका थिए ।
सोही भ्यानमा सवार पुनमदेवी साह, प्रसन्न साह, छोरी प्रन्सा साह र सोही ठाउँका पृथ्वीनाथ साह घाइते भएका छन् । घाइते चारैजनाको बिर्तामोडस्थित बीएन्डसी अस्पतालमा उपचार भइरहेको छ ।
दुर्घटनापछि पिकअप चालक सुमन पौडेल र दुवै सवारी साधनलाई प्रहरीले नियन्त्रणमा लिएर थप अनुसन्धान गरिरहेको छ ।
.jpg)
