काठमाडौं : छायांकन सुरु भएको ३९औं दिनमा चलचित्र ‘कुस्ती’को छायांकन सकिएको छ ।

काठमाडौं तथा आसपासका क्षेत्रमा छायांकन गरिएको चलचित्रमा प्रेमसँगै स्वभाव भिन्नताले एकसाथ जीविकोपार्जन गर्न संघर्ष गर्न बाध्य जोडीको कथालाई देखाइने निर्माता तथा निर्देशक अनिल योञ्जनले जानकारी दिए ।

“कलाकार र प्राविधिकको मेहनतका कारण हामीले निर्धारित समयमा छायांकन सम्पन्न गर्न सफल भयौं । एक अर्कासँग छुट्टिएर बस्न नसक्ने र सँगै रहन पनि नसक्ने भावनाको मधुर यात्रालाई यस चलचित्रमा समेटेका छौं । भावनात्मकतासँगै हाँस्यरसले भरिएको प्रेम कथानक चलचित्र तयार गरेका छौं”, उनले भने ।

चलचित्रमा मिरुना मगर, धीरज मगर, पुस्कर गुरुङ, भोलाराज सापकोटा, दीकिला शेर्पा, रवीन्द्र झा, पुस्कर गुरुङ, राजाराम पौडेल, किरण केसी, लुनिभा तुलाधर, सूर्यमान लिम्बू, अरविन गुरुङ, रजनी गुरुङ, सुवर्ण थापालगायत कलाकारले अभिनय गरेका छन् ।

अभिनेत्री मगरले लेखिएको कथालाई चलचित्रको पर्दामा उतार्न कुनै कसर बाँकी नराखिएको बताइन् । “सहरको एक आधुनिक जोडीको कथालाई चलचित्रमा दर्शकले हेर्न पाउनु हुनेछ । बाहिरबाट हेर्दा सामान्य देखिने विषयले एउटा दम्पतिको जीवनमा पार्ने असरलाई हामीले प्रस्तुत गर्नेछौं”, उनले भनिन् । उनले चलचित्र आगामी वर्ष विसं २०८२ को भदौमा प्रदर्शन हुने बताइन् ।

चलचित्रमा उमंग शाहीले छायांकन, मित्रदेव गुरुङले सम्पादन, दीपक शर्मा, अनिल योञ्जन, कल्याण सिंहले संगीत सिर्जना, शिशिर खातीले नृत्य निर्देशन गरेका छन् ।