बर्दिया : बर्दियाको राजापुर नगरपालिकामा अपाङ्गता भएका बालबालिकासँग सम्बन्धित स्थानीय नीति निर्माण कार्यशाला आयोजना गरिएको छ ।
कार्यशाला इजुकेसनल अपरच्युनिटी फाउन्डेसनको आर्थिक सहयोग, गुड नेवर्स युके र गुड नेवर्स इन्टरनेसनल नेपालको प्राविधिक सहयोग तथा सेवक नेपाल कैलालीको संयोजनमा आयोजना गरिएको हो ।
अपाङ्गता भएका बालबालिकाको अधिकार, पहुँच, शिक्षा, स्वास्थ्य तथा सामाजिक सुरक्षाबारे नीतिगत पहल र स्थानीय तहको भूमिकाबारे कार्यशालामा छलफल गरिएको थियो ।
कार्यशालामा जनप्रतिनिधि, विषयगत शाखाका प्रमुखहरू, विद्यालय व्यवस्थापन समिति तथा शिक्षक अभिभावक संघका अध्यक्ष तथा प्रतिनिधि, अपाङ्गता भएका शिक्षक, अपाङ्ग सञ्जाल र अपाङ्गताको क्षेत्रमा कार्यरत संघसंस्थाका प्रतिनिधिहरूको सहभागिता रहेको थियो ।
कार्यशालामा नीति निर्माणका लागि नगरपालिकामा अपाङ्गता भएका बालबालिकाले भोगिरहेका समस्या, आवश्यकताहरू र समाधानका उपायबारे सुझाव संकलन गरिएको नगरपालिकाले जनाएको छ ।
यसअघि गेरुवा गाउँपालिका र मधुवन नगरपालिकामा समेत कार्यशाला आयोजना गरिएको थियो ।
