काठमाडौं : भृकुटीमण्डपमा आयोजित नेपाल इलेक्ट्रिक पावर एन्ड लाइट्स तथा नेपाल कन्जुमर इलेक्ट्रोनिक्स एन्ड होम अपलायनसेस अन्तर्राष्ट्रिय प्रदर्शनीको चौथो संस्करण आइतबार सम्पन्न भएको छ ।

प्रदर्शनीमा विद्युत् तथा विद्युतीय क्षेत्रमा आबद्ध विभिन्न कम्पनीका प्रतिनिधि, सरकारी निकायका पदाधिकारी, विदेशी तथा स्वदेशी ब्रान्डका सामग्री, वितरण गर्न इच्छुक व्यक्ति तथा संस्था, व्यापारी, उद्योगी, तथा सर्वसाधारणको बाक्लो उपस्थिति थियो ।

स्वदेशी तथा विदेशी कम्पनीका १ सयभन्दा बढी स्टल रहेको प्रदर्शनीमा ट्रान्समिसन तथा डिस्ट्रिब्युसन सामग्री, ऊर्जा आपूर्ति तथा कन्ट्रोल डिभाइस्, हाउस वायरिङका सामग्री, तार, केबुल एवं कन्डक्टरलगायतका उत्पादक तथा विक्रेताको सहभागिता थियो । विद्युतीय उपकरणलाई प्रवर्धन तथा प्रोत्साहन गर्ने, विद्युत् तथा गुणस्तरीय विद्युतीय सामग्रीको व्यवसाय विकास एवं यस क्षेत्रसँग आबद्ध आन्तरिक र अन्तर्राष्ट्रिय व्यापारको सहजीकरण एवं प्रवर्धनका लागि सो प्रदर्शनी आयोजना गरिएको आयोजकले जनाएको छ ।

शुक्रबारबाट मिडिया स्पेस सोल्युसनस्, फ्युचरेक्स ट्रेड फेयर एन्ड इभेन्ट्स तथा एक्जिबिसन एन्ड ट्रेड सर्विसेस इन्डियाले संयुक्त रूपमा प्रदर्शनीको आयोजना गरेका थिए । सो प्रदर्शनीमा नेपाल विद्युत् प्राधिकरण र नेपाल सौर्य विद्युत् उत्पादक संघ सहयोगीको रूपमा रहेका थिए ।