काठमाडौं : नेपाल वैदेशिक रोजगार व्यवसायी संघका महासचिव महेशकुमार बस्नेत राष्ट्रिय व्यावसायिक पहल (एनबिआई)को कार्यसमिति सदस्यमा निर्वाचित भएका छन् ।

शुक्रबार सम्पन्न संस्थाको १९औं साधारणसभाले कुशकुमार जोशीको अध्यक्षतामा १७ सदस्यीय नयाँ कार्यसमिति निर्वाचित गरेको छ । संस्थाको महासचिवमा सुरेन्द्रवीर मालाकार रहेका छन् ।

पत्रकारिता र राजनीतिक शास्त्रमा स्नातकसम्मको अध्ययन गरेका व्यवसायी बस्नेत ग्लोबल राइजिङ प्लेसमेन्ट प्रालिका सञ्चालक हुन् । रोटरी क्लब गोंगबुको सन् २०१९–२० का प्रेसिडेन्ट रहेका व्यवसायी बस्नेत विभिन्न सामाजिक क्षेत्रमा क्रियाशील रहेका छन् ।

नेपालमा भएको दशक लामो सशस्त्र द्वन्द्वको पीडादायी समयमा तीन प्रमुख व्यावसायिक संस्थाहरू अर्थात् नेपाल उद्योग वाणिज्य महासंघ, नेपाल चेम्बर अफ कमर्स र होटल एसोसिएसन अफ नेपालले संयुक्त रूपमा काठमाडौंमा ‘शान्ति निर्माण, मेलमिलाप र विकासमा निजी क्षेत्रको भूमिका’ शीर्षकको राष्ट्रिय सम्मेलन आयोजना गरेर राष्ट्रिय व्यावसायिक पहलको स्थापना भएको थियो ।

विगतमा नेपाल वैदेशिक रोजगार व्यवसायी संघका तत्कालीन अध्यक्ष रोहन गुरुङको निवासमा भएको बम विस्फोटनको घटनामा राष्ट्रिय व्यावसायिक पहलले भत्र्सना गर्दै सुरक्षा र राहतका लागि सरकारसँग जोडदार माग गरेको थियो ।