काठमाडौं : मंसिर १ गतेदेखि सुरु हुने सिद्धार्थ बैंक नेपाल प्रिमियर लिग (एनपिएल) क्रिकेटको दोस्रो संस्करणको खेल तालिका सार्वजनिक भएको छ । नेपाल क्रिकेट संघ (क्यान)ले सोमबार सार्वजनिक गरेको तालिकाअनुसार उद्घाटन खेलमा गत संस्करणको विजेता जनकपुर बोल्ट्स र काठमाडौं गोर्खाज आमनेसामने हुने छन् ।

उद्घाटन खेल त्रिवि क्रिकेट मैदान, कीर्तिपुरमा अपराह्न ४ बजेदेखि सुरु हुनेछ । यसपटकको एनपिएलमा अधिकांश खेलहरू रातिको समयमा हुनेछन्, किनभने रंगशालामा फ्लडलाइट जडानको काम अन्तिम चरणमा पुगेको छ ।

क्यानले सार्वजनिक गरेको तालिकाअनुसार लिग चरणका १९ खेल, तीन प्लेअफ खेल र फाइनल गरी २३ खेलमध्ये अधिकांश फ्लडलाइटमा खेलिनेछन् । त्रिवि मैदानमा हाल १० हजार दर्शक क्षमता भएको नयाँ पारापिट निर्माण सम्पन्न भइसकेको छ ।

यो संस्करणमा कुल ७ टोली प्रतिस्पर्धा गर्नेछन्– जनकपुर बोल्ट्स, सुदूरपश्चिम रोयल्स, लुम्बिनी लायन्स, काठमाडौं गोर्खाज, विराटनगर किंग्स, चितवन राइनोज र पोखरा एभेन्जर्स ।
गत संस्करणमा जनकपुरले सुदूरपश्चिमलाई ५ विकेटले पराजित गर्दै उपाधि जितेको थियो ।

लिग चरणका खेलहरू नोभेम्बर १७ (मंसिर १) देखि डिसेम्बर ७ सम्म चल्नेछन् । केही दिन एक वटा खेल हुनेछन् भने केही दिन दुई खेल हुनेछन्– पहिलो बिहान ११ः४५ बजे र दोस्रो दिउँसो ४ बजे ।

प्लेअफ चरण डिसेम्बर ९ देखि सुरु हुनेछ । सो दिन अंक तालिकामा शीर्ष दुई टोलीबीच क्वालिफायर १ खेलिनेछ । त्यसपछि डिसेम्बर १० मा तेस्रो र चौथो स्थानमा रहेका टोलीबीच एलिमिनेटर हुनेछ ।

क्वालिफायर १ का पराजित र एलिमिनेटरका विजेता टोलीबीच क्वालिफायर २ खेल डिसेम्बर ११ मा हुनेछ । फाइनल खेल डिसेम्बर १३ मा हुनेछ ।