माडी, चितवन : माडीको बरुवामा जारी ३०औं स्टार कप राष्ट्रिय स्तरको फुटबल प्रतियोगितामा सूर्यपुर युवा क्लब सेमिफाइनलमा प्रवेश गरेको छ ।

आयोजक स्टार स्पोर्ट युवा क्लब बरुवाका पूर्वसचिव टिकाराम सुवेदीका अनुसार शनिबार भएको क्वार्टरफाइनल खेलमा सूर्यपुरले वीरगन्ज युथ एकेडेमीलाई ३–० को फराकिलो अन्तरले पराजित गर्दै अन्तिम चारमा स्थान सुरक्षित गरेको हो ।

सूर्यपुरका लागि अश्विन तामाङ, मोहित गुरुङ र विक्रम लामाले एक–एक गोल गरेका थिए । उत्कृष्ट प्रदर्शनका आधारमा अश्विन तामाङ ‘म्यान अफ द म्याच’ घोषित भए ।

प्रतियोगिताअन्तर्गत आइतबार हुने तेस्रो क्वार्टरफाइनल खेलमा वसन्तपुर युनाइटेड क्लब माडी र सौराहाको प्याराडाइज युवा क्लबबीच प्रतिस्पर्धा हुने छ ।

स्टार स्पोर्ट युवा क्लब बरुवाले नेपाली महिलाहरूको महान पर्व हरितालिका तीज तथा जितियाको अवसर पारेर आयोजना गरेको प्रतियोगितामा १० टोली सहभागी छन् ।

प्रतियोगिताको विजेता टोलीले ट्रफी, मेडल, प्रमाणपत्रसहित नगद २ लाख ५१ हजार १११ रुपैयाँ पाउनेछ भने उपविजेताले मेडल, प्रमाणपत्र र नगद १ लाख २५ हजार ५५५ रुपैयाँ प्राप्त गर्नेछ । त्यस्तै, उत्कृष्ट खेलाडीहरूलाई पनि विशेष विधागत पुरस्कार प्रदान गरिने आयोजक क्लबका अध्यक्ष सन्देश बरालले जानकारी दिए ।